Өзбекистан, америкиниң хан абад һава базисини ишлитишигә чәклимә қойди


2005.06.16
Share on WhatsApp
Share on WhatsApp

Америка мудапиә министирлиқи, өзбекистан һөкүмитиниң америкиниң өзбекистанниң хан абад районидики һәрбий базисини ишлитиштә бәзи чәклимиләр йолға қойғанлиқини билдүрди.

Америка мудапиә министирлиқи баянатчиси брайин витманниң билдүрүшичә, өзбекистан һөкүмити америкиниң хан абаддики һәрбий базисидин пайдилинишида чәклимиләр йолға қоюп, мәзкур базисидин айропиланларниң кечидә учушини чәклигән.

Хәвәрләргә қариғанда, өзбекистан һөкүмити мәзкур чәклимиләрни, америка вә хәлқара кишилик һоқуқ тәшкилатлириниң -13 май күни әнҗанда йүз бәргән қанлиқ бастуруш һәрикити һәққидә тәкшүрүш елип бериш тоғрисидики тәләплиридин кейн йолға қойған.

Америкида чиқидиған вашингтон пост гезитиниң хәвәр қилишичә, америка мәркизи қоманданлиқ шитаби өзбекистан һөкүмитиниң мәзкур қараридин кейин тәкшүрүш вә қутқузуш паалийәтлиридә ишлитилидиған, типлиқ айропиланлирини өзбекистандики хан абад һәрбий базисидин, афғанистандики баграм һәрбий базисиға йөткигән.

Лекин, америка ташқи ишлар министирлиқиниң баянатчиси маккормик, пәйшәнбә күни мухбирларға бәргән баянатида, өзбекистан һөкүмитиниң америкиниң хан абад базисидики һәрбий паалийәтлиригә қойған чәклимилиригә қаримай, өзбек хәлқиғә инсани рәвиштә муамилә қилишқа мәҗбурлаш үчүн хәлқара җамаәтчлиги билән бирликтә өзбекистан һөкүмитигә бесим ишлитишни давамлаштуридиғанлиқини билдүрди.

Бу арида, пәйшәнбә күни өзбекистан һөкүмити тәрипидин әнҗандики вәқәләрни тәкшүрүш үчүн қурулған хизмәт гурупписи, әнҗандики намайиш җәрянида йүз бәргән тоқунушларда 176 кишиниң өлгәнликини билдүрди. Хәлқара кишилик һоқуқ тәшкилатлири әнҗандики бастуруш җәрянида 500 дин 1000 ғичә адәм өлгәнликини тәкитлимәктә.

Мәзкур тәкшүрүш гурупписи әнҗандики бастуруш һәққидики доклатида, президент ислам кәримофқа охшашла, әнҗандики вәқәләр, өзбекистан һөкүмитини ағдуруп, өзбекистанда бир ислам дөлити қурмақчи болған әсәбий диний күчләр тәрипидин чиқирилған, дәп хуласә чиқарған. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт