Б д т қирғизистан даирилириниң 4 нәпәр өзбек мусапирни дөлитигә қайтуруветиш һәрикитини әйиплиди


2005.06.10
Share on WhatsApp
Share on WhatsApp

Б д т ниң мусапирлар мәһкимиси, җүмә күни қирғизистан даирилириниң 4 нәпәр өзбек мусапирни дөлитигә қайтуруветиш һәрикити хәлқара әһдинамиларға хилап, дәп әйиплиди.

Қирғизистан һөкүмити илгири қирғизистанда паналиниватқан уйғур сияси мусапирлирини хитайға қайтуруп бәргән. Б д т мусапирлар мәһкимиси қирғизистан даирилириниң һәрикитидин чөчигәнликини билдүрди. Өзбекистанға қайтуруп берилгән 4 нәпәр мусапир, керимоф һөкүмити әнҗандики намайишни бастурғандин кейин қирғизистанға қечип барған.

Кишилик һоқуқни көзүтүш тәшкилати әнҗандики намайишчиларни бастуруш һәрикитини " қәтлиам" дегән иди. Б д т мусапирлар мәһкимисиниң қирғизистандики әмәлдари әлмар багировниң билдүрүшичә, қирғизистан даирилири пәйшәнбә күни қирғизистандики өзбек мусапирлар лагиридин 16 кишини тутуп кетип, уларниң ичидики төт кишини суал - сорақсизла өзбекистан даирилиригә өткүзүп бәргән.

Бирләшмә ахбарат агентлиқиниң хәвәр қилишичә, қирғизистан ташқи ишлар министири роза отанбайева, сияси панаһлиқ тилигүчиләрниң өзбекистанмға қайтурулмайдиғанлиқини билдүргән болсиму, әмма қирғизистан һөкүмитидики бәзи даириләр, мусапирлар мәсилисигә гуман билән қарайдикән.

Мусапирлар мәһкимиси қирғизистан даирилиридин мусапирларни қоғдашни тәләп қилди. Б д т мусапирлар мәһкимиси җүмә күни елан қилған баянатида, қирғизистан б д т мусапирлар мәһкимиси билән имзалиған сияси мусапирларни дөлитигә мәҗбури қайтурушқа болмайдиғанлиқи тоғрисидики келишимгә очуқ - ашкарә бузғунчилиқ қилди, дәп әйиплигән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.