Xitay amérika bazisini taqashni telep qilish toghrisida qirghizistan'gha bésim ishletken

Qirghizistandiki mutexessislerning ashkarilishiche, qirghizistan béshkek etrapidiki amérika herbiy bazisini taqashni telep qilish toghrisida xitayning bésimigha uchrighan.

Qirghizistandiki siyasi penler mutexessisi qasiqbayéw qirghizistan radi'osida söz qilip, béshkektiki amérika herbiy bazisini taqash xitayning menpe'etige uyghun kélidighanliqini bildürgen. Uning tekitlishiche, béyjing da'iriliri amérikining béshkektiki herbiy bazidin paydilinip, xitayning Uyghur aptonom rayonidiki herbiy pa'aliyitini oghriliqche közütüshidin ensireydiken.

Qasiqbayéw, shangxey guruhidiki döletlerning amérikini ottura asiyadin qoshun chékindürüshke chaqirish toghrisidiki bayanati rusiye teripidin emes, xitay teripidin otturigha qoyulghanliqini bildürdi. Qasiqbayéwning tekitlishiche, eger amérika béshkektiki herbiy bazigha signal ayropilanlirini orunlashtursa, xitayning pütün gherbiy shimalini közüteleydiken.

Qirghizistan hökümiti yéqinda amérika herbiy bazisining dawamliq qalidighanliqini élan qildi. Qasiqbayéwning bildürüshiche, shangxey guruhidiki döletler ichide pikir ixtilapi mewjut bolup, bu qirghizistanning shangxey guruhidin kélidighan bésimgha berdashliq bergenlikidin dérek bériken. U, mezkur teshkilatning ichki qisimidiki ixtilap, shangxey guruhining parchilinishini keltürüp chiqirishi mumkin, dep körsetken. (Erkin)