Мустәқил дөләтләр һәмдостлуқидики демократик яшлар тәшкилатлири бирләшти


2005.08.21

Оттура асия учур мәркизиниң хәвәр қилишичә, мустәқил дөләтләр һәмдостлуқиға тәвә бир қисим дөләтләрниң демократик яшлар тәшкилатлири бирлишип, өз дөләтлири вә районниң демократийилишишни илгири сүрүштә ортақ тиришчанлиқ көрситишкә пүтүшкән.

Хәвәрдин мәлум болушичә, украинийиниң "пәйт", русийиниң" биз", қирғизистанниң "биргә" вә қазақистанниң "қаһар" дәп аталған яшлар тәшкилатлири бирлишип, дөләтләр һалқиған демократик тор һасил қилған.

Уларниң билдүрүшичә, мәзкур дөләт һалқиған демократик торниң характери сиясивилик, өктичилик вә иҗтимаийлиқ қатарлиқ хусусийәтләргә игә болуп, барлиқ демократик һәрикәтләр вә тәшкилатларға өз пуқралириниң гражданлиқ һоқуқини қоғдаш, тәң-баравәрлик асасида демократийилишишни әмәлгә ашуруш һәмдә диктатурулуқ хаишлириға қарши күрәш қилиш үчүн бирликкә кәлгән фронт қурушни тәшәббус қилиду. Буниңдин илгири оттура асия демократик тәшкилатлири вә партийилири берлингә җәм болуп, оттура асия демократик қурултийини қайтидин тәсис қилип, рәсми ишқа киришкән иди. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.