Бишкәк сәнәткарлири шаңхәй һәмкарлиқиниң йиғиниға җиддий тәйярлиқ қилмақта


2007.07.01

Қирғизистанниң көп сандики режиссор вә сәнәт йетәкчилиридин тәшкилләнгән гуруппа һөкүмәтниң уюштуруши билән шаңхәй һәмкарлиқ тәшкилатиға әза дөләтләр алий рәһбәрлириниң йиғини җәрянида өткүзүлидиған сәнәт фестивалиға тәйярлиқ қилмақта.

Қирғизистан миллий учур агентлиқи "қабар"ниң хәвәр қилишичә, авғуст ейида бишкәктә өткүзүлидиған бу йиғинниң сәнәт фестивали үч түркүмгә бөлүп елип берилидикән, йәни қирғизистан саһибхан сүпитидә ечилиш мурасими өткүзгәндин башқа шаңхәй һәмкарлиқ тәшкилатиға әза дөләтләрниң сәнәт гуруппилири айрим-айрим һалда өз номурлирини көрситидикән.

Қирғизистан режиссорлири фестивалниң пүтүн программилирини орунлаштуруш үчүн тәйярлиқлар елип бармақта . Қирғизистан муавин мәдәнийәт министириниң ейтишичә, астанада өткүзүлгән фестивалға қазақистан төт милйон доллар хәҗлигән болса, шаңхәйдә өткүзүлгән фестивалға хитай йәттә милйон доллар сәрп қилған. Әмма, қирғизистанниң бу фестивалға аҗратқан мәблиғини башқилар билән селиштуруш мумкин әмәс икән.

Шундақ болушиға қаримай , қирғизистан һөкүмити шаңхәй һәмкарлиқ тәшкилатиниң алий рәһбәрләр йиғининиң бишкәктә ечилишини дағдуғилиқ өткүзүш үчүн пүтүн имканийәтлири билән тәйярлиқ қилмақта.

Һазир бир қисим ғәрб сиясийонлири шаңхәй һәмкарлиқ тәшкилатиниң ғәрбкә тақабил туруш үчүн һәрикәт қиливатқан һәрбий -сиясий тәшкилатқа айлиниватқанлиқини тәнқид қилсиму, лекин русийә вә хитай рәһбәрлири бу нуқтини инкар қилмақта. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.