Bishkek sen'etkarliri shangxey hemkarliqining yighinigha jiddiy teyyarliq qilmaqta

Qirghizistanning köp sandiki rézhissor we sen'et yétekchiliridin teshkillen'gen guruppa hökümetning uyushturushi bilen shangxey hemkarliq teshkilatigha eza döletler aliy rehberlirining yighini jeryanida ötküzülidighan sen'et féstiwaligha teyyarliq qilmaqta.

Qirghizistan milliy uchur agéntliqi "qabar"ning xewer qilishiche, awghust éyida bishkekte ötküzülidighan bu yighinning sen'et féstiwali üch türkümge bölüp élip bérilidiken, yeni qirghizistan sahibxan süpitide échilish murasimi ötküzgendin bashqa shangxey hemkarliq teshkilatigha eza döletlerning sen'et guruppiliri ayrim-ayrim halda öz nomurlirini körsitidiken.

Qirghizistan rézhissorliri féstiwalning pütün programmilirini orunlashturush üchün teyyarliqlar élip barmaqta . Qirghizistan mu'awin medeniyet ministirining éytishiche, astanada ötküzülgen féstiwalgha qazaqistan töt milyon dollar xejligen bolsa, shangxeyde ötküzülgen féstiwalgha xitay yette milyon dollar serp qilghan. Emma, qirghizistanning bu féstiwalgha ajratqan meblighini bashqilar bilen sélishturush mumkin emes iken.

Shundaq bolushigha qarimay , qirghizistan hökümiti shangxey hemkarliq teshkilatining aliy rehberler yighinining bishkekte échilishini daghdughiliq ötküzüsh üchün pütün imkaniyetliri bilen teyyarliq qilmaqta.

Hazir bir qisim gherb siyasiyonliri shangxey hemkarliq teshkilatining gherbke taqabil turush üchün heriket qiliwatqan herbiy -siyasiy teshkilatqa ayliniwatqanliqini tenqid qilsimu, lékin rusiye we xitay rehberliri bu nuqtini inkar qilmaqta. (Ümidwar)