Shangxey hemkarliq teshkilatigha eza dölet bashliqliri, yéngi kélishimler imzalimaqchi

Jüme küni, qirghizistan prézidénti qurmanbék baqiyif, kéler ay qirghizistanning paytexti béshkek shehiride ötküzülidighan, shangxey hemkarliq teshkilati dölet bashliqliri yéghini jeryanida, bir qatarliq muhim kélishimler imzalinidighanliqini bildürdi.

Shangxey hemkarliq teshkilatigha eza bolghan xitay, qazaqistan, qirghizistan, rusiye, tajikistan we özbékistan qatarliq 6 dölet rehberliri bixeterlik, soda-tijaret, medeniyet, edliye we herbiy sahede öz-ara hemkarliqni téximu kücheytidighanliqini tekitlep kelgen idi.

Qirghizistan shangxey hemkarliq teshkilatining nöwettiki re'islik wezipisini ötewatqan bolup, prézidént baqiyif we qirghizistan hökümiti shangxey hemkarliq teshkilatining xelq'aradiki tesirini kücheytish hemde bu teshkilatining rayonning bixeterliki we muqimliqini saqlashtiki rolini ilgiri sürüsh üchün jiddiy tirishchanliq körsetmekte.

Baqyif jüme küni bishkekte bergen bayanatida, shangxey hemkarliq teshkilati we musteqil döletler hemdostluqi kolliktip bixeterlik kélishimi teshkilatining, biri-biri bilen masliship ishleydighan we bir-birini toluqlaydighan ikki teshkilat ikenlikini bildürdi.

Musteqil döletler hemdostluqi kolliktip bixeterlik kélishimi teshkilatigha rusiye, bilarus, ermenistan, qazaqistan, qirghizistan, tajikistan we özbékistan qatarliq döletler eza.

Prézidént baqiyif, shangxey hemkarliq teshkilati we musteqil döletler hemdostluqi kolliktip bixeterlik kélishimi teshkilatining bixeterlik mesilside, térrorchiliqqa qarshi turushta asasen oxshash köz qarashqa ige ikenlikini tekitlep, emma bu ikki teshkilat nurghun mesililerde perqliq nishanlarni meqset qilidu, dédi. (Ömer qanat)