Özbékistan qirghizistan bilen bolghan qarasu chégra éghizini taqidi

Perghane agéntliqining uchuridin melum bolushiche, enjan weqesi munasiwiti bilen qirghizistandin qattiq xapa bolghan özbékistan hökümiti qirghizistan bilen chégrilinidighan qarasu shehiridiki chégra ötkilini taqiwetken. Netijide qarasu deryasigha sélin'ghan köwrükning her ikki teripige bir qanche ming kishi toplinip, tashkentning bu qilmishigha narazi bolghan.

Özbékistan taqiwetken chégra éghizi yeni derya köwrükini bu yilqi enjan weqesi jeryanida özbékistan hökümiti barliq ötkellerni taqap, chégrini qamal qilghanda ikki dölet puqraliri birliship, özlikidin pul we küch chiqirip, ikki kün ichidila yasap chiqqan idi.

Tashkent da'iriliri qirghizistanda tewesidiki qara suda yuqumluq köydürgü tarqalghan dégen uchurni bahane qilip, mezkur chégra ötkilini taqighan. Qara su deryasining qirghizistan qismida ataqliq qara su baziri bar bolup, bu yerge Uyghur élidinmu mal élip kélinidu. Özbékistan sodigerliri we puqraliri bu bazarda soda-sétiq bilen shughullinidu.

Özbékistanning bu qilmishi her ikki terep puqraliri üchün qolaysizliqlarni we iqtisadiy mesililerni keltürüp chiqarghan. (Ümidwar)