Qirghizistan kishilik hoquq jem'iyitining re'isi "bayaman weqesi" bilen Uyghurlarning munasiwiti barliqini ret qildi

Qirghizistan kishilik hoquq jem'iyitining re'isi ramizan dirildayéw, qirghizistan parlamént ezasi bayaman erkinbayéwning öltürülüsh weqesi bilen Uyghurlarning munaswiti barliqini ret qilip, " jinayetni " weqe bilen chétishliqi bar, dep qolgha élin'ghan Uyghurlargha artish üchün urunmaqta" dédi.

Amérikini ziyaret qiliwatqan dirildayéw, bu sözlerni jüme küni erkin asiya radi'osini ziyaret qilghanda tekitlidi.

Ramizan dirildayéwning ashkarilishiche, bayaman erkinbayéw öltürülgendin kéyin béshkektiki yerlik Uyghurlardin 80 dek adem qolgha élin'ghan. U, qolgha élin'ghan bezi Uyghurlarning da'iriler teripidin iqrarnamigha qol qoyushqa mejburlan'ghanliqini bildürdi.

Ramizan dirildayéwning " bayamanni öltürgen Uyghurlar emes, bu weqening Uyghurlar bilen alaqisi yoq " deydu. Bayaman erkinbayéw, bu yil 3 - ayda partlighan aqayéwni aghdurush inqilabida muhim rol oynighan shexslerning biri idi.

Bayaman erkinbayéw bir qanche hepte ilgiri béshkekte namelum kishiler teripidin öltürülgen. Uning ukisi yéqinda özige ot qoyup, qirghiz da'irilirining weqeni tekshürüshtin bash tartqanliqigha naraziliq bildürgen idi.

Dirildayéw qirghizistan emeldari tashtömür aytbayéwni , béyjinggha barghanda xitaylarning narénqolda öltürülgen 20 dek Uyghur sodiger sherqiy türkistan küchliri teripidin öltürüldi, dégen tetür teshwiqatigha masliship bérish bilen eyiblidi.

Dirildayéw qirghizistan da'irilirini tenqid qilish bilen birge, qirghizistandiki Uyghurlarni milliy we jama'et menp'etini qoghdashta " passip", dep eyiblidi. Uning eskertishiche, Uyghurlar siyasiy jehette aktip bolmighiche , ularning menpe'eti depsendige uchrashtin saqlan'ghili bolmaydiken. (Erkin)