Özbékistan enjan weqeside qirghizistanning qoli bar, dep eyiplidi

Özbékistan dölet axbarat agéntliqi düshenbe küni xewer élan qilip, bu yil 13 mayda enjanda yüz bergen isyan'gha qirghizlarning qol tiqqanliqini ilgiri sürdi.

Roytérs axbarat agéntliqining xewer qilishiche, özbékistan axbarat agéntliqi da'iriler élip barghan deslepki tekshürüsh netijisidin melum bolushiche, sani 60 qa yétidighan qoralliq qirghizlar qirghizistandiki qishlaqlarda qurulghan lagirlarda telim - terbiye alghandin kéyin, enjan'gha yoshurunche kirip, diniy esebiyler bilen til biriktürgen, dep yazghan.

Qirghizistan hökümiti seyshenbe küni özbékistan da'iriliridin ularning bu köz qarishini ispatlaydighan maddi pakitlar bolsa élan qilishni telep qildi. Qirghizistan dölet xewpsizlik komitétining mu'awin sékritari wyachislaw xan, "qirghizistanda térrorluq lagirlar yoq, buni ispatlaydighan pakitmu yoq," dédi.

Kishilik hoquq teshkilatliri enjan weqesining siyasi bésim we namratliqtin kélip chiqqanliqini ilgiri sürmekte. Emma prézidént kérimof, weqeni diniy esebiyler chet'elde turup özbékistanda islamiy dölet qurush üchün pilanlighan heriket, dep körsetmekte.

Amérika bilen yawropa weqedin kéyin özbékistanning weqe üstidin xelq'ara tekshürüsh élip bérishke yol qoyushini telep qilip, kérimof hökümitining siyasitini tenqidligen idi. (Erkin)