Әнҗан вәқәсидики гумандарлар қийин - қистаққа елинған шараитта җинайитини иқрар қилған болуши мумкин


2005.10.27

Б д т кишилик һоқуқ комитети өзбекистанниң әнҗан шәһиридә бу йил майда йүз бәргән һөкүмәткә қарши намайиш сәвәбидин сотқа тартилған 15 гумандарниң қаттиқ қийин- қистаққа елинған шараитта "җинайити" ни иқрар қилған болуши мумкинликини билдүрди.

У қетимқи керимоф һөкүмитигә қарши намайиш қанлиқ паҗиәгә айлинип, нурғун кишиләрниң өлүшини кәлтүрүп чиқарған иди. Пәйшәнбә күни җинайәт гумандарлириниң ақлиғучилири, ташкәнт алий сотидин уларға йеникрәк җаза беришни сориди. Буниң алдида қарилиғучилар, алий соттин бу җинайәт гумандарлириниң бәшиға 20 йиллиқ, қалғанлириға 15 тин 19 йилғичә қамақ җазаси беришни тәләп қилған иди.

Әнҗан вәқәсигә четишлиқ дәп сотлиниватқан 15 җинайәт гумандарлириниң һәммиси "җинайити" ни етирап қилип, өзлириниң ислам радикаллири билән мунасивити барлиқи вә бу қетимқи вәқәни пиланлиғанлиқини иқрар қилған.

Әмма б д т кишилик һоқуқ комитети баянатида, сотниң гумандарларниң иқрарнамисидин башқа пакит көрситәлмигәнликини билдүрди. Тәкшүргүчи хадимларниң ейтишичә, гумандарларни һәтта һөкүмәттин мустәқил адвокатлар сорақ қилмиған. Бундақ шараитта гумандарларниң қаттиқ қийин- қистаққа елинип, мәҗбури иқрар қилиндурулғанлиқ еһтималлиқи юқири икән.

Вәқәниң шаһитлири вә кишилик һоқуқ паалийәтчилири, өзбекистан аманлиқ қисимлирини бу йил 5 - айда әнҗандики намайишчи хәлққә қаритип оқ чиқирип, 750 адәмниң өлүшини кәлтүрүп чиқарғналиқини билдүрмәктә. Әмма өзбекистан һөкүмити буни инкар қилип, зораванлиқни топилаң чиқарған диний радикаллар садир қилди дәп көрсәтмәктә. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.