Enjan weqesidiki gumandarlar qiyin - qistaqqa élin'ghan shara'itta jinayitini iqrar qilghan bolushi mumkin

B d t kishilik hoquq komitéti özbékistanning enjan shehiride bu yil mayda yüz bergen hökümetke qarshi namayish sewebidin sotqa tartilghan 15 gumandarning qattiq qiyin- qistaqqa élin'ghan shara'itta "jinayiti" ni iqrar qilghan bolushi mumkinlikini bildürdi.

U qétimqi kérimof hökümitige qarshi namayish qanliq paji'ege aylinip, nurghun kishilerning ölüshini keltürüp chiqarghan idi. Peyshenbe küni jinayet gumandarlirining aqlighuchiliri, tashkent aliy sotidin ulargha yénikrek jaza bérishni soridi. Buning aldida qarilighuchilar, aliy sottin bu jinayet gumandarlirining beshigha 20 yilliq, qalghanlirigha 15 tin 19 yilghiche qamaq jazasi bérishni telep qilghan idi.

Enjan weqesige chétishliq dep sotliniwatqan 15 jinayet gumandarlirining hemmisi "jinayiti" ni étirap qilip, özlirining islam radikalliri bilen munasiwiti barliqi we bu qétimqi weqeni pilanlighanliqini iqrar qilghan.

Emma b d t kishilik hoquq komitéti bayanatida, sotning gumandarlarning iqrarnamisidin bashqa pakit körsitelmigenlikini bildürdi. Tekshürgüchi xadimlarning éytishiche, gumandarlarni hetta hökümettin musteqil adwokatlar soraq qilmighan. Bundaq shara'itta gumandarlarning qattiq qiyin- qistaqqa élinip, mejburi iqrar qilindurulghanliq éhtimalliqi yuqiri iken.

Weqening shahitliri we kishilik hoquq pa'aliyetchiliri, özbékistan amanliq qisimlirini bu yil 5 - ayda enjandiki namayishchi xelqqe qaritip oq chiqirip, 750 ademning ölüshini keltürüp chiqarghnaliqini bildürmekte. Emma özbékistan hökümiti buni inkar qilip, zorawanliqni topilang chiqarghan diniy radikallar sadir qildi dep körsetmekte. (Arzu)