Özbékistan enjan weqesidiki " térrorchilar" 20 - séntebirdin bashlap sotlaydu


2005.09.06

Özbékistan da'irilirining seyshenbe küni ashkarilishiche, özbékistan hökümiti enjan weqesi üstidin xelq'ara tekshürüsh élip bérishni ret qilghandin kéyin, da'iriler 20 - séntebirdin bashlap enjan weqesini qozghidi, dep eyiblen'gen tunji türkümdiki 100 din artuq tutqunni resmi sotlaydiken.

Kishilik hoquq teshkilatliri 13 - mayda yüz bergen weqede 500 din 800 giche puqraning özbék amanliq küchliri teripidin öltürülgenlikini bildürmekte. Emma da'iriler weqede 187 kishining ölgenlikini ilgiri sürüp, buning 94 nepiri térrorchilar teripidin öltürülgen, dep élan qildi.

Roytérs axbarat agéntliqining xewer qilishiche, özbékistan ali teptish mehkimisi weqediki eng aktip shexsler, dep qaralghan 15 kishi üstidin eyipname hazirlap sot mehkimisige tapshurghan.

Özbékistan ali teptish mehkimisi bayanatchisining tekitlishiche, qalghan 106 neper tutqunning dilosi axirliship qalghan. Teptish da'iriliri sotning ochuq - ashkare ötküzilidighanliqini bildürdi.

Özbékistan da'iriliri shangxey guruhidiki xitay, rusiye, qazaqistan qatarliq döletlerning weqe yüz bergen rayonda tekshürüsh élip bérishke teklip qilghan idi. Gherb elliri özbékistan hökümiti terepsiz xelq'ara tekshürüsh élip bérishni ret qilghandin kéyin, shangxey guruhidiki döletler hazirlighan weqe toghrisidiki matiryallarni qobul qilishni ret qilghan.

Enjandiki weqedin kéyin özbékistan amérikidin xan'abad hawa armiye bazisidiki amérika qoshunlirini élip chiqip kétishni telep qildi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.