Amérika, rusiye we yawropa qirghizistanning nöwettiki weziyitini yaxshilash üchün yardem körsitidighanliqini bildürmekte

Amérika tashqi ishlar ministirliqi qirghizistanning waqitliq hökümiti bilen hemkarliship, aqayéf hökümiti aghdurulghandin kéyinki tertipni yaxshilash üchün yardem béridighanliqini bildürdi.

Royétirs agéntliqining xewiride körsitilishiche, amérika tashqi ishlar ministirliqi bayanatchisi "amérika choqum qirghizistanning nöwettiki weziyitini bir terep qilishigha hemde qirghizistan weziyitining tinchliq we heqiqet bilen netijilinishige yardem bérishi kérek" dégen. Mezkur bayanatchi yene, amérika diplomatiye xadimlirining qirghizistanning waqitliq hökümet rehberliri qurmanbék baqéyif we filikis quloflar bilen alaqe baghlap, mesillerni bir terep qilish üstide muzakire élip baridighanliqini tekitligen.

Amérika we rusiyining pozitsiyisi

Amérika tashqi ishlar ministiri kondiliza rayis jüme küni rusiye tashqi ishlar minisitiri sérgey lawruf bilen téléfon arqiliq söhbetliship, ikki terepning hazirqi weziyette rolining intayin chong ikenlikini shuningdek qirghizistanning her ikki terepning yardimige éhtiyajliq ikenlikini otturigha qoyghan.

Bu arida amérika birleshme axbarat agéntliqi, rusiyining qirghizistan sabiq prézidénti aqayéfning siyasiy panahliq teliwini qobul qilish bilen birge derhal qirghizistan waqitliq hökümet rehberliri bilen di'alog qurghanliqini ashkarilighan.

Közetküchilerning otturigha qoyushiche, buningdin rusiyining, ukra'iniye duch kelgen weziyettin sawaq élip, özining ottura asiyadiki istratégiyilik ornini saqlap qélish muddi'asini körwilishqa bolidiken.

Metbu'atlarda bu heqte élan qilin'ghan maqalilarda yene , ukra'iniyide ötken yili yüz bergen "xelq namayishi arqiliq hakimyitini aghdurwitish" inqilabi rusiyige intayin chong ders bergen bolup, rusiye ashkara halda ukra'iniyining sabiq hakimyet da'irilirini qollighan idi. Epsus mezkur hakimiyet aghdurulup, rusiye özining yéngilghanliqini tonup yetken idi. Shunga, rusiye bu qétim qirghizistanning meyli hazirqi waqitliq rehberliri bilen bolsun yaki sabiq rehbiri bilen bolsun öz alaqisini üzmigenliki otturigha qoymaqta.

Aqayéf texttin chüshüp uzun ötmey, rusiye prézidénti putin qirghizistanda yüz bergen topilangdin bi'aramliq his qilghanliqini biraq öktichilerning rusiye we qirghizistan munasiwitini tereqqi qildurushqa körsetken hessisige yuqiri baha béridighanliqini hemde qirghizistanda tikilinidighan yéngi hökümetning rusiye bilen téximu yaxshi bir munasiwet berpa qilishini ümid qilidighanliqini bildürgen.

Qirghizistanning weziyitidin oxshashla endishilen'gen yawropa bixeterlik we hemkarliq teshkilati 3 neper qanun mütexessisini qirghizistan'gha ewetip, kona we yéngi parlamént otturisidiki siyasiy ixtilaplarni bir terep qilishqa yardemlishishini buyrighan.

Naraziliq

Aqayéf hakimyitige qarshi öktichilerdin biri muxbirlarning ziyaritini qobul qilip, parlamént ezaliridin ümitsizlen'genlikini, parlamént ezalirining aldi bilen döletke bixeterlik we dimokratiye élip kélishi kéreklikini, eksinche hazir parlamént ezalirining bolsa siyasiy hoquqni aldinqi orun'gha qoyup, bixeterlikke we xeliqning nöwettiki weziytige köngül bölmeywatqanliqini, xelqning erkin we adil saylam arqiliq prézidént we parlamént saylap chiqishni telep qiliwatqanliqini bildürgen.

Qirghizistan waqitliq hökümiti, 6 - ayning 26 -küni prizidént saylimi élip bérilidighanliqini élan qilghan.

Yawropa bixeterlik we hemkarliq teshkilatining qirghizistan'gha ewetken alahide wekilliri yekshenbe küni ötküzülgen muxbirlarni kütiwilish yighinida, saylamdin burun ishleshke tégishlik xizmetlerning nahayiti köp ikenlikini bolupmu qirghizistanning bixeterlik weziyitini yaxshilashning muhim ikenlikini tekitligen. (Eqide)