Ottura asiya hemkarliq teshkilatining bashliqlar yighini ötküzüldi

Qazaq, qirghiz, özbék, afghan we rusiyilerni öz ichige alghan ottura asiya hemkarliq teshkilatining bashliqlar yighini tajikistan paytexti düshenbide bashlandi. Qirghizistan prézidénti akayéf, qazaqistan prézidénti nazarbayéf, özbékistan prizdénti kerimoflar yekshenbe küni düshenbige yétip kelgen. Yighinning heqiqi küntertipi düshenbe küni bashlinidu. Afghanistan bu qétimqi yighin'gha prézidént hamit karzayning qatnishalmaydighanliqini élan qildi. Karzayning ornigha afghanistanning mu'awin prézidénti hédayet emin penshéri qatnishidu. Rusiye prézidénti wladimir putin shenbe küni tajikistan'gha kelgen.

U yekshenbe küni tajikistandiki rusiye armiyisining herbiy bazisini échish murasimigha qatnashti. Düshenbidiki yighinning küntertipi térrorchiliq we zeherlik chékimlik tijaritige qarshi hemkarliq, su mesilisi, énérgiye menbelirini échish, xelq'ara transport karidori, déhqanchiliq we sana'et sahesidiki hemkarliq türlirini öz ichige alidu. Ottura asiya hemkarliq teshkilati qazaqistan, qirghizistan, özbékistan we tajikistanlar teripidin 2002 - yili qurulghan. Kéyin bu teshkilatqa rusiye bilen afghanistan eza bolup kirgen. Mezkur teshkilat yilda bir qétim bashliqlar yighini ötküzüp kelmekte. (Erkin)