Tajikistan, özbékistandin chékinidighan amérika qoshunlirini kütüwélishqa teyyar

Tajikistanda hakimiyet béshidiki siyasi partiye, özbékistandin chékinidighan amérika herbiy xadimliri we herbiy eslihelirining bir qisimini tajiksitan'gha orunlashturush we kütüwélishqa teyyar, dep körsetti.

Amérika özbékistan hökümitining bu yil 5 - ayda enjandiki namayishchilarni basturush herikitini ashkare tenqid qilghandin kéyin, kérimof hökümiti xan'abad herbi bazisidiki amérika qoshunlirining 6 ay ichide özbékistandin ayrilishini telep qilghan.

Amérika xan'abad hawa armiye bazisidiki qoshunlirini yötkeydighan yéngi bazigha ihtiyaji bar- yoqliqini hazirghiche tilgha almidi. Emma qirghizistandiki herbiy baza bilen afghanistandiki bazilarning taqalmaydighanliqini bildürmekte.

Tajikistanda hakimiyet béshidiki xelq démokratiye partiyisining mu'awin re'isi dewlet eli dewletow, roytérs axbarat agéntliqigha "siyasi weziyetning qandaq bolushidin qet'iy nezer, biz amérika bilen yéqindin hemkarlishimiz. Siyasitimiz xoshnilirimizgha oxshash özgermidi," dep tekitligen.

Emma roytérs axbarat agéntliqining düshenbidiki gherb diplomatlirining sözini neqil keltürüshiche, amérika hazirghiche özbékistandiki qoshunlirini tajikistan'gha orunlashturushni qarar qilmighan.

Tajikistan bu yil 7 - ayda amérikidin ottura asiyadiki bazilirini taqashni telep qilghan shangxey guruhidiki döletlerning biri idi. Dewlet eli dewletow, rusiyining bu mesilidiki pozitsiyisi "muhim," deydu. (Erkin)