Qirghizistan hökümiti, qirghizistandiki amérika qisimlirining uzun muddet bu dölette turidighanliqini bildürdi
2005.07.26
Düshenbe küni qirghizistanda ziyarette bolghan amérika mudapi'e ministiri donald ramsféld bilen körüshken qirghizistan rehberliri, qirghizistandiki amérika herbiy qisimlirining afghanistandiki weziyet ongshalghiche bu dölette turalaydighanliqini bildürgen.
Amérika birleshme agéntliqining xewer qilishiche, qirghizistan mudapi'e ministiri général isma'il isaqof béshkekte, amérika mudapi'e ministiri donald ramsféld bilen birlikte ötküzgen muxbirlarni kütüwélish yighinida, amérikining manas herbiy bazisi afghanistandiki weziyet ongshalghiche pa'aliyitini dawamlashturidu, dédi
Shangxey hemkarliq teshkilatigha eza döletlerning dölet we hökümet rehberliri yéqinda qazaqistanning paytexti astanida ötküzgen aliy derijilik yighinida bir qarar layihisi maqullap, amérika hökümitidin ottura asiyadiki herbiy qisimlirini chikindürüp chiqish üchün éniq bir waqit belgilishini telep qilghan idi.
Qirghizistan prézidénti qurmanbék baqiyéf 10 iyul küni ötküzülgen saylamda qirghizistan prézidénti bolup saylan'ghandin kéyin bergen bayanatida, afghanistanda weziyet muqimlashqanliqini, amérikining qirghizistandiki eskerlirini chikindürüp chiqip kétish waqti kelgenlikini bildürgen idi.
Béshkekte amérika mudapi'e ministiri donald ramsféld bilen uchrashqan qirghizistan mudapi'e ministiri isaqof, amérika herbiy qisimlirining qirghizistanda turushi, afghanistandiki weziyetning tereqqiyatigha baghliq, afghanistanda weziyet muqimlashqandin kéyin, amérika herbiy qisimlirining turushi üchün hajet qalmaydu. Lékin, hazir afghanistandiki weziyet téxi muqimlashmidi. Bu mesilide men amérika mudapi'e ministiri bilen oxshash köz qarashta, dédi.
Ramsféld seyshenbe küni qirghizistandiki ziyaritini axirlashturup tajikistan'gha bérip, tajikistan prézidénti imam'eli raxmanof we mudapi'e ministiri général shir'eli xeyrulllayof bilen uchrashti.
Xewerlerge qarighanda, tajikistan rehberliri, amérikining afghanistandiki herbiy heriketlirini qollaydighanliqini tekitlep, amérikining yenila tajikistandiki herbiy bazilardin paydilinalaydighanliqini bildürgen. (Qanat)
Munasiwetlik maqalilar
- Amérika dölet mudapi'e ministiri donald ramsféld ottura asiyada
- Donald ramsfild, qirghizistanni amérika bazisi munaswiti bilen ziyaret qildi
- Rusiye, qirghizistandiki herbiy bazisida turushluq qisimlirini köpeytmekchi
- Xitay hökümiti, amérika qoshun chékindürüsh toghrisidiki telepler hörmet qilishi kérek, dédi
- Türkiye mutexessislirining qirghizistan heqqidiki qarashliri