Qurmanbék baqiyéf amérika - qirghizistan ijare heqqi ixtilapida téz birlikke kélishni telep qildi


2006.06.05
Share on WhatsApp
Share on WhatsApp

Qirghizistan prézidénti qurmanbék baqiyéf düshenbe küni bu dölettiki amérika hawa armiye bazisining ijare heqqi mesiliside ikki terepning tézrek birlikke kélishni telep qildi. Bazining ijare heqqini chöridigen bu ixtilap qirghizistandiki amérika hawa armiye bazisining kélechikige tehdit salmaqta idi.

Prézidént baqiyéf ishxanisining ashkarilishiche, qirghizistan prézidénti amérika bilen bolghan bu söhbet " bizning iqtisadi menpe'etimiz we muhit mesilisidiki endishilirimizni közde tutqan halda imkaniyetning bériche tézrek hel bolushini ümid qilimiz " dep tekitligen. Amérika da'iriliri bilen qirghizistan hökümiti ötken hepte bazining ijare heqqide toghrisida 2 kün söhbet élip barghan bolsimu,lékin kélishim hasil qilalmidi. Terepler dawamliq söhbet ötküzüshke maqul bolghan. Prézidént baqiyéf , eger amérika 1 - iyun'ghiche qirghizistan bilen kélishim hasil qilmisa, manas bazisidiki amérika qisimlirining chiqip kétishini telep qilimiz, dep tehdit salghan, lékin u bu sözlirini kéyinrek qayturuwaldi.

Qirghizistan amérikidin manas hawa armiye bazisining ijare heqqi üchün yilda 200 milyon dollar töleshni telep qilmaqta. Amérika ijare heqqini üstürüshke maqul bolghan, lékin qirghizistan terep telep qilghan ijare sommisini ret qilmaqta.

Birleshme axbarat agéntliqining xewer qilishiche, afghanistan dölet mudapi'e ministiri abdulrehim wardaq düshenbe küni qirghiz dölet mudapi'e ministiri ismayil isaqofqa téléfon qilip, qirghizistandiki amérika bazisi afghanistanning muqimliqi üchün muhim rol oynawatqanliqini tekitligen. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.