Amérika, qirghizistan hökümitining amérikiliq eskerni sotlash telipini ret qildi

Béshkektiki amérika bash elchiliki düshenbe küni qirghizistan hökümitining bir qirghiz puqrasini öltürüwetken amérika eskirini qirghizistan qanunlirigha asasen sotlash telipini ret qildi.

Amérika bash elchixanisi bir bayanat élan qilip, 2001‏- yili amérika bilen qirghizistan otturisida imzalan'ghan kélishimde ikki döletning qirghizistandiki amérika eskerlirining amérika qanunlirining kapaliti asitda bolidighanliqi toghrisida kélishkenlikini bildürdi. Lékin bayanatta, qirghiz saqchi da'irilirining amérika eskiridin soraydighan su'allirini aldin amérika xadimlirigha sunalaydighanliqi hemde amérika xadimliri teripidin élip bérilidighan tekshürüshke qatnishalaydighanliqi eskertilgen.

Béshkek etrapigha jaylashqan manas ayrodromidiki amérika herbiy bazisi teripidin élan qilin'ghan bayanatta bildürülüshiche, 6 ‏- dékabir küni yüz bergen weqede amérika eskiri kamaz shopuri teripidin tehdit qilin'ghandin kéyin, özini qoghdash üchün uni öltürgen. Bayanatta, amérika herbiy tüzüm we edliye belgilimilirige asasen, kéreklik tedbirler élindighanliqi eskertilgen.

Qirghizistan tashqi ishlar ministirliqi, amérikidin amérikiliq eskerning qirghizistan qanunlirigha asasen jawabkarliqqa tartilishigha yol qoyushini telep qilghan idi.

Qirghizistan parlaménti jüme küni, manastiki amérika herbiy bazisi xadimlirini qirghiz da'irilirining weqe heqqide tekshürüsh élip bérishigha ruxset bermidi dep eyiblep, qirghizistan hökümitidin amérika herbiy bazisining pa'aliyitini qaytidin közdin köchürüshni telep qilghan idi. (Qanat)