قىرغىزىستاننىڭ دۆلەتلىك "قابار" ئاگېنتلىقىنىڭ ئۇچۇرىدىن قارىغاندا، ئۆزبېكىستاننىڭ دۆلەت مۇداپىئەسىگە ئىشلىتىدىغان ھەربىي خىراجىتى ئوتتۇرا ئاسىيادىكى باشقا مەملىكەتلەردىن زور دەرىجىدە كۆپ ئىكەن.
قابارنىڭ مەلۇماتىدىن قارىغاندا، 2005-يىلى قازاقىستاننىڭ ھەربىي چىقىمى 448 مىليون ئامېرىكا دوللىرى بولغان بولسا، ئۆزبېكىستاننىڭ 764 مىليون دوللارغا يەتكەن. 2006-يىلى ئۇنىڭ ھەربىي خىراجىتىنىڭ 802 مىليون دوللارغىچە بولۇشى پەرەز قىلىنماقتا ئىكەن.
ئوتتۇرا ئاسىيادىكى بەش دۆلەتنىڭ 2005-يىللىق ھەربىي خىراجىتىنىڭ ئومۇمىي سوممىسى 1مىليارد 336 مىڭ دوللار بولغان، بۇ يىل 1مىليارد 570 مىڭدىن ئېشىشى مۇمكىن ئىكەن.
ئۆزبېكىستان ھازىر دۆلەت خامچوتىنىڭ 5.2%نى، قازاقىستان 1.01 %نى ھەربىي خىراجەتكە ئىشلىتىدۇ. شۇنداق بولغاندا، ئۆزبېكىستان ئوتتۇرا ئاسىيادىكى بەش دۆلەت ئىچىدە ھەربىي خىراجەتكە ئەڭ كۆپ پۇل چىقىرىدىغان مەملىكەت بولۇپ ھېسابلىنىدىكەن.
مۇتەخەسسىسلەرنىڭ بىلدۈرۈشىچە، 1999-يىلىدىكى ئىچكى ئۇرۇشتىن كېيىن ئىسلام كەرىموپ ئۆز ھاكىمىيىتىنى مۇستەھكەملەش ئۈچۈن ئارمىيىنى كۈچەيتىشكە ئەھمىيەت بەرگەن بولۇپ، ئۆزبېكىستاننىڭ ھاۋا ، قۇرۇقلۇق قىسىملىرى باشقا ئوتتۇرا ئاسىيا مەملىكەتلىرىگە نىسبەتەن كۈچلۈك ھېسابلىنىدۇ. ئۆزبېكىستان قوراللىق كۈچلىرىنىڭ 1999-2000-يىللىرىدىكى ۋەقەلەردە ۋە ئۆتكەن يىلدىكى ئەنجان ۋەقەسىدە ئىسلام كەرىموپنىڭ بۇيرۇقىنى ياخشى ئورۇنلىغانلىقى بىلدۈرۈلمەكتە. (ئۈمىدۋار)