Қазақистан ентернет контроллиқини күчәйтиш пиланини йолға қойди

Ройетрис агентлиқиниң 6 ‏- июл күни бәргән хәвиригә қариғанда, қазақистан даирилири, ғәрб әллириниң қаттиқ тәнқиди вә бесимиға қаримай, ентернет учурлирини өз ичигә алған мәтбуат әркинликини контрол қилидиған бир қанун лайиһисини оттуриға қойди.

Һәтта телевизийә мухбирлириниң әркинликини боғушниму өз ичигә алған мәзкүр қанун лайиһиси, мушу һәптә рәсмий йолға қоюлди. Бирақ мәзкүр лайиһә қазақистанда кишиләрниң күчлүк наразилиқини қозғиди.

Қазақистанниң виримя гезитиниң зияритини қобул қилип , бу һәқтә тохталған қазақистан ахбарат министири ярмуһаммәт йертисбайеф": бизниң мәқситимиз пәқәт , қазақ ентернет тор бәтлиридики паскиничилиқларни тазилаштин ибарәт " дәп тәкитлигән.

Хәвәрләргә қариғанда, қазақистандики zonakz.net Қатарлиқ тор бәтлиридә нур султан назарбайефниң сияситини тәнқид қилидиған мақалә вә обзорлар елан қилинған болуп, қазақистан даирилири бу хил тор бәтләрниң давамлиқ мәвҗүт болуп турушини халимиғанлиқи үчүн, мәзкүр қанун лайиһисини йолға қойған.

Қазақистандики 15 милйон нопусниң 4 милйонға йеиқни ентернет мәйданиға кириду. Шундақла торға киридиған қазақ яшлириниң көпинчиси һөкүмәткә қарши өктичиләрни қоллайду вә уларға һесдашлиқ билдүриду. (Әқидә)