Islam kerimof yene prézidént bolidu

Yekshenbe küni özbékistanda prézidént saylimi axirlashti, mölcherlinishiche, prézidént islam kerimof yene qaytidin saylinishi mumkin. Gerche, saylam netijisi téxi élan qilinmighan bolsimu, biraq, bu alliqachan chiqirilip bolghan yekün. Ferghane agéntliqining xewiridin qarighanda, islam kerimof bashqa töt neper prézidént namzitini meghlup qilishi muqerrer.

Xewerlerdin qarighanda, kerimof %90 tin yuqiri awazgha érishken. Özbékistanda élip bérilghan bu qétimqi prézidént saylimigha yawropa bixeterlik we hemkarliq teshkilati bir közetküchi wekiller ömiki ewetkendin sirt yene shangxey hemkarliq teshkilatining közetküchilirimu saylam jeryanini közetken.

Xewerlerdin qarighanda, bu qétimqi prézidént saylimigha qatnashqan namzatlar ichide bir ayalmu bar bolup, gerche u ottura asiya döletliri ichide tunji qétim prézidént saylimigha chüshken ayal bolsimu, biraq uning ghelibe qilish éhtimalliqi tolimu yiraq iken.

Xelq'araliq teshkilatlar bu qétimqi saylamning adil we erkin bolmighanliqini körsitishmekte, chünki, islam kerimof öktichilerge nisbeten qattiq qolluqni dawamlashturupla qalmastin belki yen saqchi we mexpiy xizmet xadimlirini köpeytip, özige qarshi pikirde bolushtin qattiq mudapi'e körgen hem undaq kishilerge rehimsiz mu'amililerde bolghan.

2005- Yilidiki enjan qirghinchiliqidin kéyin, öktichilerge bolghan bésim téximu kücheytilgenliki melum. Téxi yéqinda ataqliq sha'ir yüsüp jüme we uning inisi babur jüme islam kerimofni texttin chüsh, dep namayish qilghanda qolgha élinip, hazirghiche qoyup bérilmigen. Prézidént saylimi bashlinish harpisida söhbet abdullayéw isimlik méditsina penliri doktori, yeni hökümet teripidin étirap qilinmighan prézidént namzati yawropa ittipaqining insan hoquqi sotigha erzi sunup, özini eng burun prézidént namzatliqigha körsetken bolsimu, lékin hökümet da'irilirining uninggha tosqunluq qilip, bahane -sewebler bilen uning namzatliqini étirap qilmighanliqini bildürgen.

Islam kerimofning üchinchi nöwet prézidént bolushi eslide özbékistan asasiy qanunigha xilap bolsimu, lékin asasiy qanun prézidént kerimofning aldida beribir küchke ige bolmighan. Sabiq kommunist rehbiri islam kerimof 18 yildin béri özbékistanni idare qilip kelmekte.(Ümidwar)