Herqaysi terepler esqer aqayéfning istipa bérishini telep qilmaqta

Yawrupa bixeterlik we hemkarliq teshkilati peyshenbe küni, qirghizistanning aghdurulghan prézidénti esqer aqayéfni tézdin resmiy istipa bérip, dölet ichidiki muqimsizliqlargha xatime bérishke chaqirdi.

Amérika birleshme axbarat agéntliqining xewirige qarighanda, yawrupa bixeterlik we hemkarliq teshkilatining re'isi dimitrij rupel özlirining qirghizistan yéngi rehberlirining qanunluq ornini étirap qilidighanliqini bildürdi. U yene esqer aqayéfni qirghizistanning yéngi rehberliri bilen söhbet ötküzüshke dewet qildi.

Buning aldida, dimitrij rupel qirghizistanning yéngi rehbiri qurmanbeg baqéyéf bilen béshkekte söhbet ötküzüp, bu yil 6 - aydiki prézidént saylimining teyyarliq xizmetlirini muzakire qilghan.

Qirghizistan yéngi hökümiti esqer aqayéfning istipa bérishini, dölet siyasitining qanunluq yolda méngishigha paydiliq dep qarap, esqer aqayéfning istipa bérishini qolgha keltürüsh üchün mexsus komitét teshkilligen. Esqer aqayéf ilgiri bixeterliki kapaletke ige qilin'ghanda, béshkekke qaytip kélip istipa bérishni xalaydighanliqini bildürgen idi.

Biraq chet'el metbu'atlirining bildürishiche, nöwette qirghizistanning yéngi rehberliri arisida, esqer aqayéfni qayturup kélish mesiliside ixtilaplar mewjüt iken.

Qirghizistan rehbiri qurmanbek baqiyéf, aghdurulghan prézidént esqer aqayéfning qirghizistan'gha qaytip istipa bérishi, yéngi zorawanliq heriketlerge yol achidu dep agahlandurghan. Biraq, qirghizistan parlaméntining bayanatchisi ömerbek tékibayéf we öktichi rehberlerning biri filiks kuluf , esqer aqayéfning qirghizistan'gha qaytip, wezipisidin istipa bérishini kütidighanliqini bildürdi.

Ötken hepte namayishchilar keng kölemde namayish ötküzüp, prézidént sariyini qamal qilghandin kiyin, prézidént esqer aqayéf qirghizistandin qéchip ketken. (Arzu)