Qazaqistan bilen xitay birleshme zhurnal neshir qilip tarqitishqa bashlidi

Qazaqistan we xitay axbarat wasitilirining uchurliridin qarighanda, yéqinda qazaqistan we xitay hökümetlirining testiqlishi bilen qazaq tilida " körshi" yeni "inaq qoshna" menisidiki uniwérsal zhurnal neshir qilinip tarqitilishqa bashlighan.

Tengri tagh torining uchuridin qarighanda, mezkur jurnalgha shinjang chet eller bilen alaqe baghlash jem'iyiti bilen qazaqistan döletlik kutupxanisining meniwi miraslar jem'iyiti birleshme igidarchiliq qilghan bolup, qazaq tilida ayda bir san chiqirilidiken. 3-Ayning 15-küni almuta shehiride mezkur jurnalning resmiy neshir qilinip tarqitilish murasimi ötküzülgen bolup, murasimgha murat awizop qatarliq qazaqistan dölet rehberliri we ilim sahesidiki erbablar shuningdek xitayning qazaqistandiki bash elchisi qatarliqlar ishtirak qilghan.

Shinxu'a agéntliqining uchuridin melum bolushiche, bu zhurnalda xitayning siyasiy iqtisadiy tereqqiyat ehwali, medeniyiti we bashqa köpligen ehwalliri tonushturulushi asas qilin'ghan bolup, bu xitay merkiziy hökümitinig qoshulushi bilen Uyghur aptonom rayoni teripidin neshir qilinidighan mexsus chet'ellerge xitayni teshwiq qilidighan tunji jurnal bolup hésablinidiken.

Xewerlerge qarighanda, yéqinqi yillardin buyan xitay hökümiti qazaqistan, qirghizistan we özbékistan qatarliq ottura asiya memliketlirige qaritilghan teshwiqatni kücheytken bolup, radi'o we téléwiziye programmilirini tarqitish, medeniyet heptisi ötküzüsh, sen'et ömeklirini ewetish qatarliq türlük usullarni paydilanmaqta. (Ümidwar)