Özbékistan bilen rusiye dostluq we hemkarliq kélishimi imzalidi

Rusiye prézidénti wladimir putin we özbékistan prézidénti islam kérimof düshenbe küni özbékistan'gha rus herbiy qisimlirining orunlashturulishigha yol achidighan bir hemkarliq kélishimini imzalidi.

Amérika birleshme agéntliqining xewer qilishiche, rusiye bilen özbékistan otturisidiki mezkur herbiy ittipaqdashliq kélishimining imzalinishidin bir qanche sa'et burun, özbékistan soti 15 kishini bu yil may éyida özbékistanning enjan shehiride yüz bergen naraziliq herikitini teshkilligen dep eyiblep, ular üstidin höküm chiqirip, ularni 14 yildin 20 yilighiche qamaq jazasi bilen jazalidi.

Xelq'ara kishilik hoquq teshkilatliri özbékistan sotining bu hökmini qattiq tenqid qilip, sotning hökümetning tapshuruqi boyiche höküm chiqarghanliqini bayan qilmaqta.

Xewerlerge qarighanda, rusiye bilen özbékistan otturisidiki kélishim, krimil sariyida ötküzülgen daghdughiliq bir murasimda prézidént putin we islam kérimof teripidin imzalan'ghan. Kélishimni imzalashtin burun islam kérimof, rusiyige özbékistan hökümitini qollighanliqi üchün rehmet iytip, bu kélishim bilen ikki dölet munasiwetlirining misli körölmigen derijide yéqinlishidighanliqini we rusiyining bu kélishimni imzalighanliqidin héchqachan pushayman bolmaydighanliqini, rusiyining özbékistanning eng ishenchlik dosti we ittipaqdishi ikenlikini tekitligen.

Kélishimde, ikki döletning herbiy hujumgha uchrighan teqdirde bir- birige yardem béridighanliqi we her ikki döletning bir- birining téritoriyisidiki herbiy bazilardin paydilinalaydighanliqi tekitlen'gen. (Qanat)