Өзбекистан билән русийә достлуқ вә һәмкарлиқ келишими имзалиди

• 
  2005-11-14

Русийә президенти владимир путин вә өзбекистан президенти ислам керимоф дүшәнбә күни өзбекистанға рус һәрбий қисимлириниң орунлаштурулишиға йол ачидиған бир һәмкарлиқ келишимини имзалиди.

Америка бирләшмә агентлиқиниң хәвәр қилишичә, русийә билән өзбекистан оттурисидики мәзкур һәрбий иттипақдашлиқ келишиминиң имзалинишидин бир қанчә саәт бурун, өзбекистан соти 15 кишини бу йил май ейида өзбекистанниң әнҗан шәһиридә йүз бәргән наразилиқ һәрикитини тәшкиллигән дәп әйибләп, улар үстидин һөкүм чиқирип, уларни 14 йилдин 20 йилиғичә қамақ җазаси билән җазалиди.

Хәлқара кишилик һоқуқ тәшкилатлири өзбекистан сотиниң бу һөкмини қаттиқ тәнқид қилип, сотниң һөкүмәтниң тапшуруқи бойичә һөкүм чиқарғанлиқини баян қилмақта.

Хәвәрләргә қариғанда, русийә билән өзбекистан оттурисидики келишим, кримил сарийида өткүзүлгән дағдуғилиқ бир мурасимда президент путин вә ислам керимоф тәрипидин имзаланған. Келишимни имзалаштин бурун ислам керимоф, русийигә өзбекистан һөкүмитини қоллиғанлиқи үчүн рәһмәт ийтип, бу келишим билән икки дөләт мунасивәтлириниң мисли көрөлмигән дәриҗидә йеқинлишидиғанлиқини вә русийиниң бу келишимни имзалиғанлиқидин һечқачан пушайман болмайдиғанлиқини, русийиниң өзбекистанниң әң ишәнчлик дости вә иттипақдиши икәнликини тәкитлигән.

Келишимдә, икки дөләтниң һәрбий һуҗумға учриған тәқдирдә бир- биригә ярдәм беридиғанлиқи вә һәр икки дөләтниң бир- бириниң територийисидики һәрбий базилардин пайдилиналайдиғанлиқи тәкитләнгән. (Қанат)