Өзбекистан билән русийә иттипақдашлиқ шәртнамиси түзмәкчи

Русийиниң хәвәрләр агентлиқиниң ашкарилишичә, өзбекистан президенти ислам керимоф 14- ноябир күни москвани зиярәт қилип, русийә президенти владимир путин билән икки дөләт һәмкарлиқи мәсилисидә ортақ пикир һасил қилиду. Русийә агентлиқиниң учурида ейтилишичә, ислам керимоф бу қетим владимир путин билән русийә-өзбекистан иттипақдашлиқ шәртнамисигә қол қойидикән. Бу шәртнамә 2004-йили түзүлгән өзбекистан-русийә истратегийилик һәмкарлиқ келишимини асас қилған болуп, буниңдин кейин өзбекистан билән русийиниң мунасивити истратегийилик һәмкарлиқтин иттипақдашлиқ мунасивәт дәриҗисигә көтүрүлүп, мунасивәт техиму қоюқлишидикән.

Америкида яшайдиған өзбекистан өктичи сиясийонлири ислам керимоф билән владимир путин арисида түзүлидиған иттипақдашлиқ келишимини, ислам керимофниң өзбекистанни қайтидин русийиниң контроллуқиға бағлаш шуниңдәк униң русийә билән иттипақ түзүш арқилиқ демократик ислаһат елип беришни тәләп қиливатқан америка билән қаршилишиши дәп қаримақта. Хәвәрдә көрситилишичә, өзбекистан русийә билән һәрбий һәмкарлиқ вә бихәтәрлик саһәсидики һәмкарлиқни күчәйтишни халайдиғанлиқини билдүргән. (Үмидвар)