Issiq kölde shangxey hemkarliq teshkilatining birleshme herbiy manéwiri bashlandi

"Issiq köl 2007, térrorizmgha qarshi turush " dep atalghan, shangxey hemkarliq teshkilatigha eza döletlerning birleshme herbiy manéwiri düshenbe küni qirghizistandiki issiq köl boyida bashlandi. Üch kün'ge sozulidighan mezkur manéwirgha shangxey hemkarliq teshkilatigha eza xitay, rusiye, qazaqistan, qirghizistan, özbékistan we tajikistanlarning saqchi hem bixeterlik sistémisining xadimliri ishtirak qilghan.

Perghane agéntliqining qirghizistan milliy bixeterlik komitétining tarqatqan uchuridin neqil keltürüshiche, mezkur manéwir üch basquchqa bölüp élip bérilidu. Bu jeryanda shangxey hemkarliqigha eza döletlerning bixeterlik sahesi térrorluq teshkilat ezalirining heriketlirige birlikte zerbe bérish, dölet chégrilirini mudapi'e qilishni kücheytish qatarliq türler boyiche hemkarliq shekillirini manéwir qilidu. Bulardin bashqa yene herbiy qisimlarmu qatnashturulup, térrorchi guruppilarni qamal qilish , yoqitish hemde görüge élin'ghanlarni azad qilish qatarliq herbiy opératsiyilirini ötküzüshmu pilanlan'ghan.

Xewerlerge qarighanda, bu manéwirgha shangxey hemkarliq teshkilatidin bashqa yene rusiyining tesiri astidiki kolléktip bixeterlik kélishimi teshkilati, musteqil döletler hemdostluqining térrorizmgha qarshi merkizi qatarliq orunlarmu özlirining wekillirini qatnashturghan. Bulardin bashqa yene shangxey hemkarliq teshkilatining közetküchilik salahiyitini qolgha keltürgen pakistan, iran, hindistan we mongghuliyimu özlirining közetküchi wekillirini ewetken.

Yéqinda ürümchide shangxey hemkarliqigha eza döletlerning yighini bolup ötken idi, mezkur yighinda bu yil 7-ayda rusiyide ötküzülidighan chong kölemlik birleshme herbiy manéwir mesililiri muzakire qilin'ghan shuningdek yene, düshenbe küni béyjingda shangxey hemkarliqidiki döletlerning axbarat-uchur ishliri boyiche hemkarliq yighini bolup ötti. (Ümidwar)