Qirghizistan hökümiti özbéklerning tiligha resmiy salahiyet bérishni ret qildi

Qirghizistan dölet ishliri sékritari adxan madmarop, yawropa bixeterliki we hemkarliqi teshkilatining az sanliq milletler ishliri boyiche komissari rolf éke'usni qobul qilghanda, qirghizistan jumhuriyitining fédéral memliket emesliki tüpeylidin az sanliq milletlerning tiligha resmi salahiyet bérelmeydighanliqini bildürdi.

Qirghizistanning qabar agéntliqining uchuridin melum bolushiche, qirghizistan dölet ishliri sékritari jalal abad we osh oblastliridiki özbéklerning özbek tilini qirghizistandiki resmi tillarning biri qilip békitish telipini ret qilip, qirghizistanda peqet qirghiz we rus tillirighila asasiy qanun boyiche resmi tilliq salahiyet bérilgenlikini, egerde bügünki künde özbek tilini resmi hökümet tili qilip békitkende ete-ögün bashqa milletlerningmu shundaq telep qoyushi mumkinlikini otturigha qoyghan.

27-May küni jalal abad oblastida 700 din artuq adem qatnashqan özbéklerning naraziliq namayishi yüz bergen bolup, namayishchilar bishkek da'iriliridin özbek tilini resmi hökümet tillirining biri qilip ishlitishni shuningdek hökümet orunlirigha özbéklerni ishqa élishni telep qilghan idi.

Yawropa bixeterliki we hemkarliqi teshkilatining mezkur wekili eshu rayon'gha bérip, özbéklerni ziyaret qilghandin kéyin , bu mesile heqqide qirghizistan da'iriliri bilen sözleshken idi.

Qirghizistan dölet ishliri sékritari madumarop sözide özbék tiligha salahiyet bérishni qet'iy ret qilish bilen birge qoshna özbékistanda yashaydighan qirghizlargha özbékistan hökümitining til we bashqa jehetlerdin héchqandaq salahiyet bermigenlikini misal we seweb qilip körsitishke tirishqan.

Xewerlerge qarighanda, qirghizistanning jenubida texminen 800 ming etrapida özbékler yashaydiken. ( Ümidwar)