Muhemmed salix: xitay ottura asiya ellirining bixeterlikige eng chong tehdit

• 
  2005-07-05

Özbékistan erk partiyisining qurghuchisi, özbék öktichiler herikitining rehbiri muhemmed salix, seyshenbe küni erkin asiya radi'osini ziyaret qilip, rusiyige qarighanda xitayni ottura asiya ellirining bixeterlikige eng chong tehdit, dep körsetti.

Muhemmed salixning tekitlishiche, xitaylarda etraptiki rayonlargha bolupmu ottura asiyagha ige bolush yolidiki impéryalizim pikir éqimi mewjutken. U, xitayning hazirche amérika herbiy küchige taqabil turush iqtidari bolmisimu, " emma u bu küchni bara - bara yétildürmekte," dep körsetti. Muhemmed salixning tekitlishiche, ottura asiya ellirining yawropa ittipaqigha oxshash musteqil döletlerni asas qilghan türkiy döletler birligi qurup, tashqi siyaset we pulni birlikke keltürüsh, chégra we tamozhna tosaqlirini bikar qilish mumkinchiliki bar iken.

Uyghurlarni " türkiy xelqler ichidiki eng éghir zulumgha duch kéliwatqan millet," dep tekitligen muhemmed salix, amérika we gherb ellirini Uyghurlargha köngül bölüshke chaqirdi. Muhemmede salixning tekitlishiche, enjan weqesidin kéyin, özbékistanning tashqi siyasiti xitay bilen rusiyige qayghan. U, "qolimizdiki pakitlar enjan weqeside ölgen puqralarning 4500 ge yétidighanliqini ispatlimaqta," dédi shundaqla prézidént kérimofni öz xelqighe qarshi irqiy tazilash élip bérish bilen eyiplidi.

Muhemmed salix, 1993 - yildin béri chet'elde sürgün hayatini yashimaqta. U ikki hepte ilgiri amérikigha kelgen. (Erkin)