Қирғизистан 29 нәпәр өзбек мусапирини қайтуруп бәрмәйдиған болди


2005-06-26
Share

Русийиниң "хәвәрләр" агентлиқиниң учуриға асасланғанда, қирғизистан һөкүмити өзбекистан тәләп қилған 29 нәпәр мусапирни өзбекистан ға қайтуруп бериш пиланини тохтитип қойди. Әслидә қирғизистан даирилири ташкәнт тәрипидин 13-май күни йүз бәргән әндиҗан вәқәсини кәлтүрүп чиқириш билән әйибләнгән мәзкур 29 мусапирни қайтуриветишкә қарар қилған иди. Әмма, улар хәлқара җәмийәтниң җүмлидин бирләшкән дөләтләр тәшкилатиниң қаттиқ тәнқид қилишиға учриди.

Хәлқаралиқ инсан һоқуқини көзитиш тәшкилати қирғизистан һөкүмитигә әгәр мәзкур 29 нәпәр мусапирниң өзбекистан ға қайтуриветилсә, уларниң һаятиниң хәвпкә учрайдиғанлиқини әскәртип, бишкәкниң хәлқара қанунларға риайә қилип, тоғра қарар чиқириши һәққидә мураҗәт қилди.

Қирғизистан "қабар" агентлиқиниң учуриға қариғанда қирғизистан яшлириниң "биргә" дәп аталған бир тәшкилатиму өзбек мусапирлирини өзбекистан ға қайтурмаслиқ һәққидә һөкүмәткә мураҗәт қилған. Нәтиҗидә, қирғизистан өз пиланини өзгәртип, бу мәсилини бирләшкән дөләтләр тәшкилатиниң мусапирлар идариси билән бирликтә һәл қилишни қарар қилған.

Бешкәкбуниңдин илгири төт нәпәр өзбек мусапирини қайтуривәткән болуп, бу иш хәлқара инсан һоқуқи вә демократийини илгири сүрүш тәшкилатлири һәмдә һөкүмәтләрниң тәнқидигә учриған иди. Өзбек мусапирлириму өзлиридин әндишә қилип, б д т баш катипи кофи аннан вә башқиларға мураҗәтнамә язған .

Хәвәрләргә қариғанда һазир қирғизистан тәвәсидә тәхминән 500 әтрапида өзбек мусапири панаһлиниватмақта икән. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт