Qirghizistan özbék musapirlarni 10 kün ichide 3 - bir döletke orunlashturushni telep qildi

Qirghizistan da'iriliri, b d t teripidin özbékistan'gha qayturulsa ten jazasi yaki ölüm jazasigha höküm qilinish mumkinchiliki bar, dep agahlandurghan 15 neper özbék musapir 10 kün ichide 3 - bir döletke orunlashturulmisa, özbékistan'gha ötküzüp béridighanliqini bildürdi.

Tashkent hökümiti özbék musapirlarni ötküzüp bérish toghrisida qirghizistan'gha qattiq bésim ishletmektiken. Özbékistan hökümiti bu musapirlar térrorchilar we jinayetchiler, dep körsetmekte.

Bu yil 13 - mayda yüz bergen enjandiki weqedin kéyin, 500 din artuq özbék musapir qirghizistan'gha qéchip bériwalghan idi. Bu musapirlarning 400 din köpreki yéqinda rominiyige orunlashturuldi. Emma qirghizistan hökümiti enjan weqeside türmidin qachqan, dep qaralghan 15 musapirni tutqun qildi.

Qirghizistan bash teptishi ezimbeg béknezerow, bu kishilerning jinayetchi ikenlikini tekitlep, bulargha panahliq bérishni xalaydighan dölet chiqmighanliqini ilgiri sürmekte idi.

Béknezerow, erkin yawropa radi'osigha " eger bu kishilerning enjan weqesidin ilgiri néme ishlarni qilghanliqigha mes'ul bolidighan 3 - bir dölet chiqsa, biz ularni bu döletke ötküzüp bérimiz,"didi. Biraq u bu kishilerning qandaq jinayet sadir qilghanliqini tilgha almighan.

Béknezerowning tekitlishiche, qirghizistan bu kishilerni qobul qilishni xalaydighan bir döletning chiqishini kütmektiken. (Erkin)