Қирғизистан даирилири, қирғизистандики өзбек мусапирлирини яврупа дөләтлиригә әвәтидиғанлиқини билдүрди


2005.08.08

Дүшәнбә күни қирғизистан бихәтәрлик комитетиниң муавин рә иси виячислав хан финландийә, шивитсийә вә голландийә һөкүмәтлириниң қирғизистанда қалған 15 нәпәр өзбек мусапириниң 11 ни қобул қилишқа тәйяр икәнликини билдүргән.

13-Май күни ислам керимоф һөкүмитиниң әнҗан шәһиридә елип барған қанлиқ бастуруш һәрикитидин кейин 500 нәпәр әтрапида өзбекистан пуқраси қирғизистанда панаһланған.

Өзбекистан һөкүмити әнҗандики вәқәләрдә 190 " террорчи" ниң өлгәнликини билдүрмәктә. Лекин вәқә шаһидлири вә хәлқара кишилик һоқуқ тәшкилатлириниң билдүрүшичә, әнҗандики вәқәләрдә 500 дин артуқ адәм өлгән болуп, өлгәнләр арисида нурғунлиған аял кишиләр вә кичик балиларму бар икән.

Өзбекистан һөкүмити, қирғизистанда панаһланған өзбек мусапирлирини өзбекистанға қайтуруп бериши үчүн қирғизистан һөкүмитигә қаттиқ бесим ишләткән болсиму, әмма қирғизистан һөкүмити хәлқара кишилик һоқуқ тәшкилатлири вә ғәрб дөләтлириниң бесими нәтиҗисидә, уларни өзбекистанға қайтурмиди һәмдә бирләшкән дөләтләр тәшкилатиниң өткән ай 400 дин артуқ өзбек мусапирини қирғизистандин роминийигә йөткәп кетишигә йол қойди.

Қирғиз һөкүмити 15 өзбек мусапирини әнҗан түрмисидин қачқан җинайәтчиләр дәп тутуп қалған. Әмма, қирғизистан һөкүмити җүмә күни әгәр 10 күн ичидә қирғизистанда қалған 15 өзбек мусапирини қобул қилидиған бирәр дөләт чиқмиса, уларни өзбекистанға қайтуруп беридиғанлиқини елан қилған иди. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.