Saylam munasiwiti bilen qirghizistandiki namayishlar dawamlashmaqta

Qirghizistandiki parlamént saylimigha qarshi namayishlar dawam etmekte. Roytirs agéntliqining xewirige qarighanda, narin oblastidiki 2000 dek kishi yekshenbe küni xitaygha tutushidighan yuqiri sür'etlik tashyolni tosup, yerlik kandidatining saylam hoquqining bikar qilin'ghanliqigha naraziliq bildürgen. Ularning kandidati ishenbey qadirbikofning kandidatliq salahiyiti shenbe küni yerlik saylam komitéti teripidin ret qilin'ghan.

Jalal'abadtiki yene bir öktichi kandidatning qollighuchiliri shenbe küni yerlik hökümet binasini ishghal qilghan. Ular " esqer aqayéf chüshüp ketsun!" dégendek lozunkilarni ésip, ötken heptiki saylamning netijisini bikar qilishni telep qilghan. Qirghizistan hökümiti binaning sirtida herbiylerni orunlashturup, bashqilarning kirishini chekligen. Namayish yekshenbe künimu dawam qilmaqta.

Qirghizistan ichki ishlar ministirliqining bildürüshiche, bashqa bir qanche rayonlardimu saylamgha qarshi naraziliq pa'aliyetler élip bérilmaqta.

Ötken yekshenbe küni qirghizistanda parlamént saylimi ötküzülgen idi. Saylamni küzetken yawrupa bixeterlik hemkarliq teshkilati saylamning xelq'ara saylam ölchemlirige toshmighanliqini bildürgen. Mezkur teshkilatning körsitishiche, saylamda biletni sétiwélish, öktichi partiyining kandidatlirini saylamgha qatnashturmasliq we musteqil metbu'atlargha dexli - teruz yetküzüsh qatarliq mesililer körülgen.

Xewerge qarighanda, qirghizistan parlaméntidiki 75 orunning aran 31 i ötken yekshenbe künidiki saylam arqiliq wujudqa kelgen. Qalghan köp qisim orunlar bolsa 13 - mart küni ötküzilidighan axirqi saylamda bikitilidiken. (Arzu)