Qazaqistanning NATO bilen bolghan hemkarliqi kücheymekte

"Bügünki qazaqistan" agéntliqining uchur bérishiche, bryusséldiki shimaliy atlantik okyan ehdi teshkilatining shitabini ziyaret qilghan qazaqistan mu'awin dölet mudapi'e ministiri bulat sémbinop yétekchilikidiki bir herbiy wekiller ömiki bilen shimaliy atlantik okyan ehdi teshkilati arisida "NATO we qazaqistan " dégen témida yighin ötküzülüp, qazaqistanning shimaliy atlantik okyan ehdi teshkilati bilen bolghan hemkarliq pilani teyyarlap chiqilghan hem muzakire qilin'ghan.

Xewerdin ashkarilinishiche, qazaqistan bilen NATO ning mezkur öz aldighan élip baridighan hemkarliq pilani rayon xaraktérliq we xelq'araliq bixeterlikni kücheytish, herbiy küchlerning özara alaqilirini chongqurlashturush we ortaq herbiy heriket hemkarliqi élip bérish, térrorizmgha qarshi küresh hem pen-téxnika, shuningdek ekologiye we bashqa mesililerdiki hemkarliqlargha qaritilghan. Eger bu pilanlar emelge ashsa, qazaqistan ottura asiyadiki memliketler ichide birinchi qétim NATO bilen yéngi sewiyide, ayrim yosunda hemkarlashqan döletke aylinidiken.

Melumki, qazaqistan, qirghizistan qatarliq memliketler NATO ning "tinchliq üchün hemkarliq programmisi" gha eza bolup, bu döletler bir qanche yillardin buyan NATO bilen izchil hemkarliship, özlirining hemkarliq derijisini östürmekte . Bu döletler NATO ning démokratiye we herbiy ölchemlirige yétish üchün tirishmaqta.

Yéqinda qazaqistan hökümiti ataghliq öktichiler rehbiri ghalimjan jaqiyanopni türmidin azad qilghan.(Ümidwar)