Нәзәрбайеф, өктичиләрни қазақистанда инқилаб елип бармаслиққа агаһландурди

Қазақистан президенти нәзәрбайеф, җүмә күни қазақистанниң һазирқи демократийә хатирисини ақлап, қазақистанда украинийә билән грозийә истилидики инқилаб қозғашниң қазақистанни паракәндичиликкә елип баридиғанлиқини илгири сүрди. Нәзәрбайеф, " демократийә бизниң ахирқи нишанимиз икәнликини унтуп қалмидуқ, бирақ демократийә йолимизниң башланғучи әмәс," дәп көрсәтти.

Нәзәрбайеф, юқириқи сөзләрни қазақистан парламент бинасиниң пүтүш мунасивити билән сөзлигән қазақистан парламентиниң төвән палатасидики сөзидә тәкитлигән. Ройтерс ахбарат агентлиқи, қазақистанда һазирға қәдәр әркин вә адил сайлам елип берилмиғанлиқини билдүрди.

" Радикал өзгүрүшләр дөләтни паракәндичиликкә сөрәп кириду," дәп тәкитлигән нәзәрбайеф, қазақистанниң ғәрб истилидики демократийә билән асияниң алаһилидикини бирләштүридиғанлиқини билдүрди.

Қазақистанда өткән йили 9 - айда елип берилған сайламда парламентниң төвән палатасидики өктичиләр сиқип чиқирилған. Шу қетимқи сайлам өктичи партийиләр шундақла хәлқара көзәткүчиләрниң тәнқидигә учриған иди. Өткән йили партлиған грозийә билән украинийидики инқилаб, димократик күчләрниң һакимийәт үстигә чиқишиға йол ачқандин кейин, астана һөкүмити қазақистандики өктичиләргә зәрбә беришкә башлиған. " Дөләт бихәтәрликини аҗизлитиш" билән әйипләнгән икки өктичи партийә, қазақистан сот мәһкимиси тәрипидин тақалған. (Әркин)