Назарбайев келәр нөвәтлик президент сайлиминиң намзати қилип көрситилди

Қазақистан президенти нурсултан назарбайев, һакимийәт үстидики отан партийиси тәрипидин җүмә күни, бу йил 12 - айда өткүзүлидиған президент сайлимиға қайта намзат қилип көрситилди.

Бу йил 65 яшлардики назарбайев 16 йилдин бери қазақистанни идарә қилип кәлмәктә. Әгәр у бу қетимқи сайламда йәнә "ғәлибә" қилса, қазақистанни йәнә 7 йил идарә қилиду. У, 2012 - йилғичә қазақистан иқтисадини 2.5 Һәссә қатлашқа вәдә қилған. Әмма өктичиләр назарбайевни хиянәтчилик вә демократик ислаһатни кечиктүрүш билән әйиблимәктә. Өктичиләр 4 - декабирдики сайламда назарбайевқа қарши бир намзатниң әтрапиға иттипақлишиш үчүн тиришмақтикән.

Назарбайев, отан партийисиниң қурултийида, қазақистан 2012 - йилғичә дунядики нефит експорт қилидиған 10 дөләтниң биригә айлиниду, дәп вәдә қилди. У, демократик ислаһат елип баридиғанлиқини тәкитләш билән биргә, қирғиз вә өзбекистан қатарлиқ "хошна әлләрдики муқимсизлиқ" тоғрисида агаһландуруп, өзиниң қайта сайлиниши қазақистанниң тинчлиқи үчүн муһимлиқини тәкитлиди.

Қазақистанда өктичиләр бу йил 3 - айда йүз бәргән қирғизистандики вәқәдин кейин, қаттиқ тәқип астиға елинған иди. Бу йил 5 - айда йүз бәргән әнҗандики вәқәләр пүтүн районда җидди тәвриниш пәйда қилған. (Әркин)