Nazarbayéw kéler nöwetlik prézidént saylimining namzati qilip körsitildi

Qazaqistan prézidénti nursultan nazarbayéw, hakimiyet üstidiki otan partiyisi teripidin jüme küni, bu yil 12 - ayda ötküzülidighan prézidént saylimigha qayta namzat qilip körsitildi.

Bu yil 65 yashlardiki nazarbayéw 16 yildin béri qazaqistanni idare qilip kelmekte. Eger u bu qétimqi saylamda yene "ghelibe" qilsa, qazaqistanni yene 7 yil idare qilidu. U, 2012 - yilghiche qazaqistan iqtisadini 2.5 Hesse qatlashqa wede qilghan. Emma öktichiler nazarbayéwni xiyanetchilik we démokratik islahatni kéchiktürüsh bilen eyiblimekte. Öktichiler 4 - dékabirdiki saylamda nazarbayéwqa qarshi bir namzatning etrapigha ittipaqlishish üchün tirishmaqtiken.

Nazarbayéw, otan partiyisining qurultiyida, qazaqistan 2012 - yilghiche dunyadiki néfit éksport qilidighan 10 döletning birige aylinidu, dep wede qildi. U, démokratik islahat élip baridighanliqini tekitlesh bilen birge, qirghiz we özbékistan qatarliq "xoshna ellerdiki muqimsizliq" toghrisida agahlandurup, özining qayta saylinishi qazaqistanning tinchliqi üchün muhimliqini tekitlidi.

Qazaqistanda öktichiler bu yil 3 - ayda yüz bergen qirghizistandiki weqedin kéyin, qattiq teqip astigha élin'ghan idi. Bu yil 5 - ayda yüz bergen enjandiki weqeler pütün rayonda jiddi tewrinish peyda qilghan. (Erkin)