Назарбайеф қазақистан президентлиқиға қайта сайланди


2005-12-05
Share

Қазақистанниң нөвәттики президенти нурсултан назарбайеф дүшәнбә күни президентлиққа қайта сайланди. У астанида нәччә он миңлиған қоллиғучилириға нутуқ сөзләп, бу қетимқи сайламниң қазақистан тарихидики әң адил бир сайлам болғанлиқини билдүрди һәмдә сиясий ислаһат елип баридиғанлиқи һәққидә вәдә бәрди. Әмма хәлқаралиқ көзәткүчиләр, йәкшәнбә күни қазақистанда өткүзүлгән президент сайлиминиң хәлқара демократик өлчәмләргә тошмайдиғанлиқини билдүрмәктә.

Америка бирләшмә ахбарат агентлиқиниң хәвиригә қариғанда, яврупа бихәтәрлик һәмкарлиқ тәшкилатидики төт йүздин артуқ көзәткүчиләр, бу қетимқи сайламда ялған биләт ташлаш, риқабәтчиләр гуруһиниң әзалириға тәһдит селиш вә мәтбуатни монопол қилиштәк сахтилиқ әһваллириниң көрүлгәнликини билдүргән. Мәзкур тәшкилат дүшәнбә күнидики баянатида, "сайламда кандидатлар арисидики һәқиқий риқабәт қилиш еһтималлиқи чәкләнгән" дәп билдүрди.

Президент назарбайеф %91 аваз билән йәкшәнбә күнидики сайламда утуп чиқти. У буниң билән йәнә йәттә йил президентлиқ вәзиписини өтәйду. Назарбайеф 1989 ‏- йили қазақистанниң рәһбәрлик орнини игилигәндин бери, һазирғичә һакимийәт йүргүзүп кәлмәктә. Көзәткүчиләр, назарбайефниң гәрчә бир диктатор болсиму, әмма қазақистан иқтисадини илгири сүрүп, ғәрб әллири, русийә вә хитай билән болған мунасивитини тәңшәп кетиватқанлиқини билдүрмәктә. Қазақистандики өктичиләр болса, нурсултан назарбайефниң сайламда ғәлибә қазинишини инавәтсиз дәп җакарлиди. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт