Nazarbayéf qazaqistan prézidéntliqigha qayta saylandi

Qazaqistanning nöwettiki prézidénti nursultan nazarbayéf düshenbe küni prézidéntliqqa qayta saylandi. U astanida nechche on minglighan qollighuchilirigha nutuq sözlep, bu qétimqi saylamning qazaqistan tarixidiki eng adil bir saylam bolghanliqini bildürdi hemde siyasiy islahat élip baridighanliqi heqqide wede berdi. Emma xelq'araliq közetküchiler, yekshenbe küni qazaqistanda ötküzülgen prézidént saylimining xelq'ara démokratik ölchemlerge toshmaydighanliqini bildürmekte.

Amérika birleshme axbarat agéntliqining xewirige qarighanda, yawrupa bixeterlik hemkarliq teshkilatidiki töt yüzdin artuq közetküchiler, bu qétimqi saylamda yalghan bilet tashlash, riqabetchiler guruhining ezalirigha tehdit sélish we metbu'atni monopol qilishtek saxtiliq ehwallirining körülgenlikini bildürgen. Mezkur teshkilat düshenbe künidiki bayanatida, "saylamda kandidatlar arisidiki heqiqiy riqabet qilish éhtimalliqi cheklen'gen" dep bildürdi.

Prézidént nazarbayéf %91 awaz bilen yekshenbe künidiki saylamda utup chiqti. U buning bilen yene yette yil prézidéntliq wezipisini öteydu. Nazarbayéf 1989 ‏- yili qazaqistanning rehberlik ornini igiligendin béri, hazirghiche hakimiyet yürgüzüp kelmekte. Közetküchiler, nazarbayéfning gerche bir diktator bolsimu, emma qazaqistan iqtisadini ilgiri sürüp, gherb elliri, rusiye we xitay bilen bolghan munasiwitini tengshep kétiwatqanliqini bildürmekte. Qazaqistandiki öktichiler bolsa, nursultan nazarbayéfning saylamda ghelibe qazinishini inawetsiz dep jakarlidi. (Arzu)