Қирғизистандики бир өзбек паалийәтчиси қолға елинди


2006.08.03

Қирғизистанниң җәнубидики җалал абад вилайәтлик өзбек җәмийитиниң рәһбәрлиридин бири мәмәтқадир қарабайев бу йил 6-айда қолға елинған болуп, униңға шу җайдики сот үч йиллиқ синақта тутуш билән йәттә йил әркинликтин мәһрум қилиш җазаси бәргән.

Пәрғанә агентлиқиниң учур беришичә, мәмәтқадир җалал абад вилайитидики бир қисим өзбекләрни тәшкилләп, өзбек тилини һөкүмәт тили қилип бекитиш һәққидә қирғизистан һөкүмитигә тәләп қоюш намайишлири уюштурған болуп, намайиш җәрянида бираз қалаймиқанчилиқ келип чиққан иди. Қарабайев намайиш җәрянида қолға елинған болуп, униң ашкарилишичә, у тутулғандин кейин қирғизистан һөкүмәт, әдлийә вә сақчи хадимлири униңдин әгәр сиясий паалийәтлиридин ваз кәчсә уни қоюп беридиғанлиқини билдүргән , әмма у бу тәләпни рәт қилған икән.

Қирғизистанниң җәнубидики ош, җалал абад вилайәтлиридә зор санда өзбекләр яшайду. Өзбекләр бу вилайәтләрдики аһалиларниң асасий қисмини тәшкил қилған болуп, өзбек тили җәмийәттә кәң қоллинилсиму, әмма һөкүмәт ишлирида ишлитилмәйдикән. Шу вәҗидин өзбекләр қирғизистан һөкүмитигә бир қанчә қетим әрз сунуп, өзбек тилиға һөкүмәт тиллиқ салаһийити бериш, өзбекләрниң һөкүмәт ишлириға орунлишишиға рухсәт қилиш вә башқа мәсилиләр бойичә өз тәләплирини оттуриға қойған. Әмма, қирғизистан һөкүмити өзбек тилини рәсмий тил қилиш тәлипини рәт қилған.

Совет иттипақиниң ахирқи мәзгилидә ош областида қирғизлар билән өзбекләр арисида қанлиқ тоқунуш келип чиққан болуп, бу вәқәниң әйни вақиттики совет һакимийити тәрипидин тәйярланғанлиқи оттуриға қоюлмақта. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.