Қазақистан өктичилири сәрсанбайоғлиниң өлтүрүлүш вәқәсидә һөкүмәтни әйиблиди

Қазақистан нағиз ақ йол партийисиниң рәһбири дүшәнбә күни алматада сүйқәст билән өлтүрүлгәндин кейин, өктичи партийә йитәкчилири өлтүрүш буйруқини қазақистан һөкүмәт әмәлдарлири бәргән, дәп һөкүмәтни әйиблиди. Қазақистан нағиз ақ йол партийисиниң рәһбәрлидин алтунбек сәрсәнбайоғли вә униң қоғдиғучиси билән шопуриниң җәсиди дүшәнбә күни алмаата шәһәр сиртидики бир йол үстидә байқалған.

Ройтерс ахбарат агентлиқиниң хәвәр қилишичә, өлгүчиләрниң һәр бири дүмбә вә баш қисимидин етип өлтүрүлгән. Бу қазақистанда йүз бәргән өктичи партийә рәһбәрлириниң йеқинқи 3 ай ичидә 2 - қетим өлтүрүлүш вәқәси болуп һесаблиниду.

Қазақистан нағиз ақ йол партийисиниң рәһбәрлиридин җармақан туяқбай ахбарат елан қилиш йиғинида, вәқәни " башқиларниң буйруқи билән елип берилған вәһшиләрчә қатиллиқ " деди. Җармақан туяқбайниң әскәртишичә, " сәрсанбайоғли вә униң һәмралири қоллири бағланған һалда машина билән шәһәр сиртиға елип берилғандин кейин, вәһшиләрчә етип ташланған." Бу йил 43 яшлардики сарсәнбайоғли 2003 - йилғичә назарбайев һөкүмитидә министир вә баш әлчи қатарлиқ вәзипиләрни өтигән.

Америкиниң қазақистанда турушлуқ баш әлчиханиси арқа - арқидин баянат елан қилип, вәқә үстидин " дәрһал вә үзүл - кесил" тәкшүрүш елип беришни тәләп қилди. Әлчихана баянатида, " сәрсанбайоғли америка һөкүмити тонуйдиған вә мунасивәт қилишни халайдиған киши иди" дәп язған. Әмма һөкүмәт даирилири өктичиләрниң әйиблишини рәт қилди. Қазақистан учур министири ярмуқамәт йиртишбайев, өктичиләрни җамаәт пикри пәйда қилишқа урунуш билән әйиблигән. (Әркин)