Қирғизистан президенти өлүм җазасини бикар қилиш һәққидә буйруқ чүшүрди


2005.12.30

Қирғизистан президенти қурманбәг бақийев, пәйшәнбә күни һөкүмәткә йоллиған бир буйруқнамисида өлүм җазасини бикар қилишни буйруди.

Өлүм җазаси қирғизистанда 1998- йилдин бери йилдин‏- йилға кечиктүрүлмәктә иди. Президент бақийев, пәйшәнбә күни һөкүмәткә йоллиған буйруқнамисида, һөкүмәттин икки ай ичидә өлүм җазасиға һөкүм қилинған мәһбусларниң җазасини муддәтсиз яки узун муддәтлик қамақ җазасиға өзгәртиш тоғрисида қанун чиқиришни тәләп қилған.

Қирғизистан әдлийә даирилириниң ашкарилишичә, қирғизистанниң бәш милйон нопуси бар болуп, өлүм җазасиға һөкүм қилинған мәһбуслар 200 әтрапида икән. Шуниң билән биргә бақийев, һөкүмәт органлириға түрмә шараитини яхшилаш тоғрисида буйруқ чүшүргән. Қирғизистанда бу йил өктәбир вә ноябир айлири түрмидики мәһбуслар исян көтүрүп, түрмини тәкшүрүшкә барған парламент әзалириниң өлүш вәқәлири йүз бәргән иди.

Хәлқара кишилик һоқуқ тәшкилатлири узундин бери қирғизистанға өлүм җазасини бикар қилиш тоғрисида бесим ишлитип кәлгән. Қирғизистан 1998-йилдин бери өлүм җазасини иҗра қилмиған болсиму, әмма ақайев дәвридә у һәр йили өлүм җазасини кечиктүрүш буйруқи елан қилатти. (Әркин)

© 2005 Radio Free Asia

Мунасивәтлик мақалилар

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.