Qirghizistan prézidénti ölüm jazasini bikar qilish heqqide buyruq chüshürdi

Qirghizistan prézidénti qurmanbeg baqiyéw, peyshenbe küni hökümetke yollighan bir buyruqnamisida ölüm jazasini bikar qilishni buyrudi.

Ölüm jazasi qirghizistanda 1998- yildin béri yildin‏- yilgha kéchiktürülmekte idi. Prézidént baqiyéw, peyshenbe küni hökümetke yollighan buyruqnamisida, hökümettin ikki ay ichide ölüm jazasigha höküm qilin'ghan mehbuslarning jazasini muddetsiz yaki uzun muddetlik qamaq jazasigha özgertish toghrisida qanun chiqirishni telep qilghan.

Qirghizistan edliye da'irilirining ashkarilishiche, qirghizistanning besh milyon nopusi bar bolup, ölüm jazasigha höküm qilin'ghan mehbuslar 200 etrapida iken. Shuning bilen birge baqiyéw, hökümet organlirigha türme shara'itini yaxshilash toghrisida buyruq chüshürgen. Qirghizistanda bu yil öktebir we noyabir ayliri türmidiki mehbuslar isyan kötürüp, türmini tekshürüshke barghan parlamént ezalirining ölüsh weqeliri yüz bergen idi.

Xelq'ara kishilik hoquq teshkilatliri uzundin béri qirghizistan'gha ölüm jazasini bikar qilish toghrisida bésim ishlitip kelgen. Qirghizistan 1998-yildin béri ölüm jazasini ijra qilmighan bolsimu, emma aqayéw dewride u her yili ölüm jazasini kéchiktürüsh buyruqi élan qilatti. (Erkin)