Özbékistan parlaminti ölüm jazasini bikar qilishini maqullidi

29‏- Iyun küni özbékistan parlaminti kéngesh palatasi, ölüm jazasini bikar qilish toghrisida özbékistan asasiy qanunigha kirgüzülgen özgirishni maqullidi.

Asasiy qanun'gha kirgüzülgen özgirishke asasen, ölüm jazasi emeldin qaldurulup, buningdin kéyin ölüm jazasining ornigha muddetsiz qamaq jazasi bérilidiken. Özbékistan, ottura asiya jumhuriyetliri arisida ölüm jazasi ijra qiliniwatqan birdin bir dölet hésablinidu.

Gerche özbékistan da'iriliri, qanchilik kishining ölüm jazasigha höküm qilin'ghanliqi, qanchilik hökümning ijra qilin'ghanliqi heqqide éniq melumat bermisimu, emma özbékistanda ölüm jazasi keng ijra qiliniwatqan bolup, ölüm jazasigha höküm qilin'ghan kishilerning uruq-tuqqanliri höküm ijra qiln'ghandin künler hetta heptiler kéyin, jazasining ijra qilin'ghanliqidin xewerdar bolmaqta.

Xewerlerge qarighanda, özbékistan prézidénti islam kerimof özi, ölüm jazasini bikar qilishini teshebbus qilghan.

Köpchilikke melum bolghandek bolupmu, 2005‏- yili may éyida özbékistanning enjan shehiride yüz bergen qanliq basturushtin kéyin, kishilik hoquq teshkilatliri we gherb döletliri islam kerimof hakimiyitini ottura asiyadiki eng diktator hakimiyet dep qarimaqta.

Enjan shehiridiki basturushtin kéyin, xelq'arada qattiq tenqidge uchrighan prézidént kerimof, xitay we rusiyini ziyaret qilip, béyjing we moskwa ning qollishigha érishken hemde ular bilen her jehettin hemkarliqini kücheytken. Emma yéqindin béri özbékistan hökümiti amérika, bolupmu yawrupa ittipaqi döletliri bilen munasiwetlirini qaytidin eslige keltürüsh üchün tirishchanliq körsetmekte. (Ömer qanat)