Оттура асия рәһбәрлири диний әсәбиликниң райондики тәһдитини көптүрүвәткән

Иран мутәхәссислири оттура асия рәһбәрлириниң райондики диний әсәбий гуруһларниң тәһдитини көптүрүвәткәнликини билдүрди. Иран авази радиосиниң мутәхәссисләрдин нәқил кәлтүрүшичә, райондики дөләтләр бир тәрәптин, террорлуққа қарши күрәшни өктичи күчләргә зәрбә беришниң баһаниси қилип қоллиниш, йәнә бир тәрәптин бу дөләтләрни террорлуққа қарши күрәштики муһим қәлә қилип көрситиш мәқситидә, диний әсәбий гуруһларниң тәһдитини көптүрүп көрситишкә тиришмақта икән.

Иранниң оттура асия мутәхәссиси пирмуһәммәд муллазехи, талибан вә әл-қаидиниң тәсири күчи шәрқий вә җәнубий афғанистандики пәштунлар районида йилтиз тартқанлиқини, лекин шималий афғанистандики нопусниң көп қисимини таҗик, өзбек вә түркмәнләр игиләйдиған районларда талибан тәсир күчиниң чоң әмәсликини билдүргән.

Униң әскәртишичә, талибан вә әл-қаидә тәшкилатиниң оттура асиядики бәзи радикал ислами гуруһлар билән мунасвити барлиқини инкар қилғили болмисиму, лекин бәзи өзбек вә таҗик җәмәтлириниң өзбекистан ислам һәрикити вә һизби-тәқриргә охшаш тәшкилатлар билән болған нормал алақиси, районда әсәбий диний гуруһларниң тәһдити күчәйгәнликкә пакит болалмайдикән.

Йеқинқи йиллардин бери пакистанниң вәзиристан үлкисидә йошурунувалған әрәбләр , өзбек, чечән вә һәтта бир қисим азсандики уйғурлар билән пакистан армийиси арисида қанлиқ тоқунушлар йүз бәргәнлики тоғрисида хәвәрләр берилмәктә. Таҗикситан вә өзбекистан дөләт мудапиә министирлири ширәли хәйруллайиф һәм руслан мирзайифлар өткән айниң ахирлири қирғизистанда учрашқанда ислам әсли дин тәриқәтчиликиниң оттура асияда күчийиватқанлиқидин әндишә қиливатқанлиқини тәкитлигән иди. (Әркин)