Putin ottura asiya rehberliri bilen körüshti

Shenbe küni rusiye prézidénti wladimir putin sanktpétérburgta ötküzülgen musteqil döletler hemdostluqining naresmiy yighini jeryanida özbékistan prézidént islam kerimof we tajikistan prézidénti émam eli raxmanoflar bilen ayrim körüshüp, rusiyining ular bilen bolghan munasiwetlirini muzakire qilghan.

Intérfakis agéntliqining uchurigha asaslan'ghanda, musteqil döletler hemdostluqi elliri aliy rehberlirining naresmiy yighini her yili bir qétim échilidu, buningda hemdostluqning ortaq mesililiri muzakire qilinidu. Bu qétimqi yighinda qazaqistan prézidénti nursultan nazarbayéf köchmenler mesilisini bu yilqi asasiy mesile süpitide muzakire qilip, uni hel qilishning yollirini tépishni otturigha qoyghan. U yene musteqil döletler hemdostluqining yawropa ittipaqi bilen bolghan iqtisadiy hemkarliqlirini ashurushni telep qilghan .

Prézidént putin islam kerimof bilen ayrim körüshüp, rusiye bilen özbékistan arisida tüzülgen istratégiyilik hemkarliq kélishimge üch yil toshqanliqini eslitish bilen birge ikki terep munasiwetlirining normal tereqqiyatidin razi ikenlikini körsetken. Kerimofmu soda munasiwetlirining küchiyip, ötken yilidikidin % 60 ashqanliqini tekitligen. Arqidin putin tajik rehbiri raxmanof bilen körüshüp, ikki döletning herbiy sahediki hemkarliqliri mesilisini tilgha alghanda, raxmanof rusiyidiki tajik köchmenliri mesilisini otturigha qoyghan.

Ottura asiya küzetküchiliri rusiyining yéqindin buyan özbékistan we tajikistan bilen bolghan hemkarliqni kücheytishke tirishqan bolsimu, lékin bu ikki dölet bilen bolghan munasiwetlerde bezi soghuqchiliqlarning körülüshke bashlighanliqi, sekkiz sana'etleshken dölet yighinida rusiyining gherbning tenqidige uchrishi hemde prézidént bushning albaniye, polsha, chéx qatarliq ellerni ziyaret qilishi shuningdek kosowa musteqilliqi we rakétadin mudapi'e körüsh pilani qatarliq muhim mesililerge toghra kelgen mezkur yighinning rusiyining nurghun istratégiyilik pilanliri bilen munasiwetlik ikenlikini körsitishmekte. (Ümidwar)