Русийә, нәзәрбайифниң оттура асия иқтсадий иттипақи пиланиға соғақ муамилә қилди


2007-10-06
Share

Қазақистан президенти нурсултан нәзәрбайифниң оттура асия дөләтлири иқтисадий һәмкарлиқ тәшкилати қуруш пилани русийиниң соғақ муамилисигә учриди.

Президент нәзәрбайиф җүмә күни, мустәқил дөләтләр һәмдостлиқиниң таҗикистанниң пайтәхти дүшәнбә шәһиридә өткүзүлгән али дәриҗилик йиғинида, оттура асия иқтисадий һәмкарлиқ тәшкилати қуруши пиланини оттуриға қойған. Президент нәзәрбайиф дүшәнбә дә өткүзүлгән мухбирларни күтүвелиш йиғинида бәргән баянатида, " иқтисадий вә сиясий вастилардин пайдилинип, оттура асия районида яшаватқан 50 милйон аһалиниң өзини-өзи қамдиялайдиған бир иқтисадий базар қурушиға шараит яритип бериш үчүн, оттура асияда бир иқтисадий иттипақ қуруш тәклипини оттуриға қойдум" деди.

Ройтрис агентлиқиниң хәвәр қилишичә, нәзәрбайифниң бу пилани, русийини өз ичигә алмиғанлиқи үчүн, президент путин вә йиғинға қатнашқан русийә вәкиллири нәзәрбайифниң тәклипигә җавап қайтурмиған.

Хәвәрләргә қариғанда, мустәқил дөләтләр һәмдостлиқиниң дөләт башлиқлири йиғинида, қазақистан билән русийә оттурисида башқа ихтилапларму көрүлгән. Мәсилән, мустәқил дөләтләр һәмдостлиқиниң нөвәттики рәиси болған, қазақистан президенти нур султан нәзәрбайиф, русийиниң бу тәшкилат үстидики һакимийитидин нарази икәнликини ипадилигән. У йиғинда қилған сөзидә, " әлвәттә русийә сабиқ совит җумһурийәтлири ичидә иқтисадий җәһәттин әң күчлүк дөләт вә биз наһайити яхши һәмкарлишиватимиз. Гәрчә германийә вә франсийә яврупа иттипақи ичидә алаһидә орунға игә болсиму, лекин бу дөләтләр яврупа иттипақи ичидики кичик дөләтләрниң разилиқини алмай туруп, һечқандақ қарарни қобул қилалмайду" дегән.

Ройтерс агентлиқиниң билдүрүшичә, гәрчә нәзәрбайиф, 1991‏- йили совит иттипақи гумран болғандин кейин, 12 сабиқ совит җумһурийитиниң қатнишиши билән қурулған мустәқил дөләтләр һәмдостлиқиниң қурғучилиридин бери һәмдә колликтип бихәтәрлик келишими қатарлиқ русийиниң йетәкчиликидә қурулған, бир нәччилигән тәшкилатларниң әзаси болсиму, әмма йеқинқи айлардин бери, у мустәқил дөләтләр һәмдостлиқиға болған наразилиқини билдүрүп, оттура асияда йетәкчи бир ролға игә болуш арзусини очуқ ипадиләшкә башлиған. (Өмәр қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт