Rusiye, nezerbayifning ottura asiya iqtsadiy ittipaqi pilanigha soghaq mu'amile qildi

Qazaqistan prézidénti nursultan nezerbayifning ottura asiya döletliri iqtisadiy hemkarliq teshkilati qurush pilani rusiyining soghaq mu'amilisige uchridi.

Prézidént nezerbayif jüme küni, musteqil döletler hemdostliqining tajikistanning paytexti düshenbe shehiride ötküzülgen ali derijilik yighinida, ottura asiya iqtisadiy hemkarliq teshkilati qurushi pilanini otturigha qoyghan. Prézidént nezerbayif düshenbe de ötküzülgen muxbirlarni kütüwélish yighinida bergen bayanatida, " iqtisadiy we siyasiy wastilardin paydilinip, ottura asiya rayonida yashawatqan 50 milyon ahalining özini-özi qamdiyalaydighan bir iqtisadiy bazar qurushigha shara'it yaritip bérish üchün, ottura asiyada bir iqtisadiy ittipaq qurush teklipini otturigha qoydum" dédi.

Roytris agéntliqining xewer qilishiche, nezerbayifning bu pilani, rusiyini öz ichige almighanliqi üchün, prézidént putin we yighin'gha qatnashqan rusiye wekilliri nezerbayifning teklipige jawap qayturmighan.

Xewerlerge qarighanda, musteqil döletler hemdostliqining dölet bashliqliri yighinida, qazaqistan bilen rusiye otturisida bashqa ixtilaplarmu körülgen. Mesilen, musteqil döletler hemdostliqining nöwettiki re'isi bolghan, qazaqistan prézidénti nur sultan nezerbayif, rusiyining bu teshkilat üstidiki hakimiyitidin narazi ikenlikini ipadiligen. U yighinda qilghan sözide, " elwette rusiye sabiq sowit jumhuriyetliri ichide iqtisadiy jehettin eng küchlük dölet we biz nahayiti yaxshi hemkarlishiwatimiz. Gerche gérmaniye we fransiye yawrupa ittipaqi ichide alahide orun'gha ige bolsimu, lékin bu döletler yawrupa ittipaqi ichidiki kichik döletlerning raziliqini almay turup, héchqandaq qararni qobul qilalmaydu" dégen.

Roytérs agéntliqining bildürüshiche, gerche nezerbayif, 1991‏- yili sowit ittipaqi gumran bolghandin kéyin, 12 sabiq sowit jumhuriyitining qatnishishi bilen qurulghan musteqil döletler hemdostliqining qurghuchiliridin béri hemde kolliktip bixeterlik kélishimi qatarliq rusiyining yétekchilikide qurulghan, bir nechchiligen teshkilatlarning ezasi bolsimu, emma yéqinqi aylardin béri, u musteqil döletler hemdostliqigha bolghan naraziliqini bildürüp, ottura asiyada yétekchi bir rolgha ige bolush arzusini ochuq ipadileshke bashlighan. (Ömer qanat)