Nazarbayéf merkiziy asiya döletliri ittipaqi qurushni yene teshebbus qildi


2007-10-07
Share

5-Öktebir küni tajikistan paytexti düshenbide ötküzülgen musteqil döletler hemdostliqigha eza döletler bashliqliri yighinida qazaqistan prézidénti nursultan nazarbayéf merkiziy asiya döletliri ittipaqini qurush idiyisini yene bir qétim resmiy otturigha qoydi, rusiyining intérfakis agéntliqining uchuridin melum bolushiche, nazarbayéf muxbirlarni kütüwélish murasimida özining mezkur yighinda mezkur ittipaqini qurushni teshebbus qilghanliqini ashkarilap, merkizi asiya döletlirining jughrapiyilik jaylishish jehettin baghlinish bilen birge ortaq til we ortaq medeniyet qimmetlirige ige ikenlikini, shunga mundaq bir ittipaqni qurushning 55 milyon adem yashaydighan bu döletlerning iqtisadiy mesililirinila emes belki siyasiy mesililirini hel qilishnimu meqset qilidighanliqini tekitligen.

" Bu yerde köchmenler mesilisi, zeherlik chékimlik mesilisi we térrorchiliq xeterliri bar. Bu mesililerning hemmisini biz birlikte hel qilalaymiz, elwette, bu yerde yene rusiye bilen qoyuq munasiwet baghlashmu zörürdur" deydu nursultan ebish oghli nazarbayéf.

Nazarbayéfning bu yighinda merkiziy asiya döletliri ittipaqini qurush idiyisini otturigha qoyushi musteqil döletler hemdostluqining ajizlawatqanliqi, bu teshkilatning nami bar emeliyiti yoq nersige aylinip qéliwatqanliqi bilen baghliq ikenliki perez qilinmaqta. Nazarbayéfning merkiziy asiya döletliri ittipaqini qurush idiyisi qirghizistan teripidin qollashqa érishilgen bolsimu, biraq özbékistan prézidéntining bu mesilige soghuq mu'amilide boluwatqanliqi, uning merkiziy asiyaning birlishishidin özbékistanni chetke qalduriwatqanliqi otturigha qoyulmaqta. Bundaq bolushidiki seweb özbékistanning rayondiki rehbiri dölet bolush mumkinchiliki azlap, qazaqistanning bu rayonda küchlük we bay döletke aylinish bilen xelq'araliq tesiri éshiwatqanliqi iken.

Bu qétim düshenbide musteqil döletler hemdostluqi , kolléktip bixeterlik kélishimi, we yawro-asiya tamozhna ittipaqi qatarliq üch teshkilatning yighini arqimu-arqidin échilghan bolup, rusiyining mezkur teshkilatlarni kücheytish arqiliq, sabiq sowét ittipaqigha oxshash bir küchlük memliketke aylinip, rusiyining yawro-asiyadiki tesir küchini tiklimekchi boluwatqanliqi sewebidin nazarbayéfning merkiziy asiya döletliri ittipaqini qurush ghayisining moskwagha yaqmasliqi perez qilinmaqta. ( Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet